Бэҕэһээ, тохсунньу 31 күнүгэр, Майа сэлиэнньэтигэр иэдээн эрэйин эҥэрдэринэн тэҥҥэ тэлэн кэлбит дьон бары тутуспутунан саҥа дьиэҕэ киириилэрин үөрүүлээхтик бэлиэтээһин буолла.
Санатар буоллахха, былырыын тохсунньу 23 күнүгэр Дьоруой Попов аатынан уулуссаҕа турбут элбэх кыбартыыралаах дьиэ уокка былдьаммыта. Лоп курдук сыл буолан баран, ол алдьархайга түбэспит дьонтон 8 ыал улуус салалтатын уонна улууспут олохтоохторун көмөлөрүнэн саҥа дьиэҕэ киирэр кыахтанна. Үгүстэрэ турар бэйэлэринэн хаалбыт дьоҥҥо харчынан, аһынан-таҥаһынан, малынан-салынан көмөлөһөннөр, билигин ол ыар хоромньуларын аһарынаннар, аны, сүрэх бааһа оһорун кэтэһэллэр.
Иэдээҥҥэ түбэспит дьоҥҥо дьиҥ-чахчы күн-ый буолбут салайааччылар ‒ улуус баһылыга Николай Старостин, улуус баһылыгын бастакы солбуйааччы Павел Сазонов, социальнай боппуруостарга солбуйааччы Иван Птицын, Майа сэлиэнньэтин баһылыгын солбуйааччы Ким Нестеров уонна тутууну ыыппыт «Жилстройинвест» муниципальнай тэрилтэ дириэктэрэ Станислав Сивцев үөрүүлээх быһыы-майгы сиэригэр-туомугар кытыннылар, киирэр аан кыһыл лиэнтэтин быстылар. Саҥа дьиэ олохтоохторо нус-бааччы дьоллоохтук олороллорун Үрдүкү Айыылартан алгысчыт, Арассыыйа тыатын хаһаайыстыбатын бочуоттаах бэтэрээнэ Александр Андреев үҥэн-сүктэн, кэҥэрдии сытын таһааран көрдөстө.
‒ Улууспут салалтата, баһылык Николай Старостин хамаандата, амарах санаалаах дьон көмөлөрүнэн дьиэлэнэр дьоллоннубут, ‒ диир Саргылаана Васильева. ‒ Биһиги турар бэйэбитинэн хаалбыппытыгар бастаан гостиницаҕа уһун кэмҥэ босхо олордон улаханнык абыраабыттара. Саҥа дьиэбит сэлиэнньэ киинигэр, Самсонов уулуссатыгар, турар буолан, оҕо уһуйаана да, оскуола да, маҕаһыыннар да чугастар. Куортамҥа сылдьыы соҕотох үлэһиттээх, кыра оҕолоох ыалга ыарахан этэ. Улууһум дьонун-сэргэтин, салалтатын көмөлөрүн хаһан да умнуом суоҕа. Маннык көмө баар буолуо диэн кэтэспэтэхпит даҕаны. Ас-таҥас, мал-сал олох кэлэ турара. Бу малааһыммыт иһитэ-хомуоһа барыта дьон бэлэҕэ.
Людмила Неустроева, Любовь Петрова, Елена Шарина, Екатерина Плотникова, Надежда Винокурова, Саргылаана Васильева, Сахаяна Чонхонсун, Елизавета Ефремова бастакы күндү ыалдьыттарын баай астаах-үөллээх остуолу Саргылаана Ивановна кыбартыыратыгар тардан көрүстүлэр. Аҕыстыы кыбартыыралаах икки дьиэҕэ түөрт 46-лыы уонна иккилии 42-лии, 31-дии кв. м иэннээх кыбартыыралар бааллар.
Блогунан тутуллубут дьиэлэр сырдыктар, сылаастар. Улуус баһылыга Николай Старостин иһитиннэрбитинэн, иэдээҥҥэ түбэспит дьону дьиэлээһин үлэтэ салҕанан, аны, Степанов аатынан уулуссаҕа тутуу барыахтаах.
Аркадий Иннокентьев.