Майа учууталларын кыбытыылаах тигиилэрэ Арассыыйаҕа лауреат дипломунан бэлиэтэннэ!
Иваново куоракка, сиидэс киинигэр, сыл аайы «Лоскутная мозаика России» диэн бэстибээл-быыстапка ыытыллар. Быйыл 12-с төгүлүн тэрийдилэр.
Бу быыстапкаҕа Саха сириттэн, Өксөкүлээх Өлөксөй аатынан Норуоттар доҕордоһууларын дьиэтин иһинэн “Симэх” галерея тэрийэр “Лоскутная мозаика Якутии” быыстапкаҕа бу саас биһирэнэн, Мэҥэ Хаҥалас улууһун В.П. Ларионов аатынан Майа орто оскуолатын иистэнэр дьоҕурдаах учууталларын “Оһуор үҥкүү” сахалыы кыбытыылаах тигии оҥоһуктара, элбэх эрэгийиэн кыттыылаах Арассыыйа быыстапкатыгар көрдөрүүгэ туруорулунна уонна лауреат үрдүк аатын ылла!
—Майаҕа урут-уруккуттан тэрилтэлэринэн айар үлэни көрүү—Култуура уонна успуорт эстэпиэтэтэ ыытыллан кэллэ. Бастаан, онно быыстапкаҕа кыттар сыаллаах, ииспитин саҕалаабыппыт. Бу күһүн, кыттыахпыт диэн, бэйэм иискэ сыһыаннаах педагог кыргыттары түмпүтүм. Учуутал солото суох, онон, үлэбит быыһыгар, ордук карантин кэмигэр күүскэ үлэлээбиппит…. Эскиһин бэйэм оҥорбутум. Оттон дьүһүнүн, аттарыытын учууталлар бары сүбэнэн талан, тикпиппит. Үлэбитин улууспут, өрөспүүбүлүкэбит киэн туттуута — “Кыталык” үҥкүү ансаамбыл үбүлүөйдээх сылынан, кинилэр аатырбыт “Оһуор” үҥкүүлэригэр анаабыппыт, — диэтэ технолог, CӨ үөрэҕириитин туйгуна, иистэнньэҥ учууталлар бөлөхтөрүн салайааччы Елизавета Егоровна КУЛИЧКИНА.
Хаартыскаҕа (хаҥастан уҥа):
Анна Александровна Петухова (английскай тыл учуутала), Марианна Петровна Скуратова (алын сүһүөх кылаас учуутала), Нарыйаана Гаврильевна Илларионова (нуучча тылын, литературатын учуутала), Елизавета Егоровна Куличкина (технология), Марфа Еремеевна Новгородова (нуучча тылын учуутала).
Татьяна МАРКОВА.