Уопсастыба

Майа лиссиэйэ «Сайдыс» саҥа технопааркаланна

Үөрэнээччилэргэ саҥа «Сайдыс» технопаарка аһылынна.
И.Г.Тимофеев аатынан Майатааҕы лиссиэй иһинэн, «Сайдыс» саҥа технопаарка арыллыытын үөрүүлээх күнэ буолла. Лиссиэй дириэктэрэ Татьяна Попова манна аҕыс сыллааҕыта тэхиньиичэскэй хайысхалаах куруһуок тэриллибитин, онно туһулаан тэрээһин арааһа тиһиктээхтик ыытыллыбытын, атын оскуолалары кытары ыкса сибээс олохтоммутун кэпсээтэ. «СӨ Үүнэр көлүөнэ тус сыаллаах пуондатын өйөбүлүнэн ыра санаабыт туолла. Саҥа тэриллээх технопааркаланныбыт. Бу үөрэнээччилэрбитигэр идэҕэ туһаайан үлэни күүһүрдэргэ улахан көмөлөөх буолуоҕа. Маннык үчүгэй усулуобуйаҕа оҕолорбут уонна учууталларбыт ураты уонна сонун толкуйдарын, бырайыактарын олоххо киллэрэр кыахтаныахтара», — диэтэ кини.
СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров СӨ Ил Дархан Айсен Николаев «О стратегических направлениях развития образования в Республике Саха (Якутия)» ыйааҕынан, 2024 сылга диэри хас биирдии улууска уонна куорат уокуруктарыгар оҕолор дьарыктаналларыгар технопааркалар тэриллиэхтээхтэрин, цифровой үөрэхтээһин, инновационнай кииннэр ситимнэрин кэҥэтии, оҕолору киэҥник хабан дьарыктааһын, үлэни ситимнээхтик тэрийии дьоһун суолтатын бэлиэтээтэ. СӨ наукаларын академиятын научнай-үөрэтэр киинин  салайар Юрий Семенов 2017 сыллаахха оҕолорго кванториум аһыллыбытын санатта. Билигин оҕолор технопааркалара ситиһиилээхтик сайдалларын эттэ.
Онлайн тэрээһин кэмигэр эбийиэги тэйиччиттэн олорон көрүү экскурсията ыытылынна. Технология учуутала, оскуола технопааркатыгар эбии үөрхтээһин педагога Петр Птицын үчүгэй, улахан кыамталаах компьютернай тиэхиньикэ туруоруллубутун, Легонан  уонна робототехниканан дьарыктанарга конструкция, лазерынан үлэлииргэ, 3-D моделированиеҕа туттуллар тэриллэр, квадрокоптердар уонна да атын аныгы тэриллэр баалларын эттэ.
«Мин 3-Д графикаҕа ВорлдСкиллс эрэгийиэннээҕи чөмпүйэнээтигэр бастаабытым. Салгыы «Инженернай дизайн» хайысханан Москваҕа кыттыбытым. Биһиэхэ маннык усулуобуйаны тэрийбиттэрэ олус үчүгэй, махтанабын», — диэн 7 кылаас үөрэнээччитэ Радомир Илларионов үөрүүтүн үллэһиннэ.
Маны сэргэ, улуустааҥы үөрэх управлениетын, улуустааҕы IT-киин, «Якутия» технопаарка» бэрэстэбиитэллэрэ уо.д.а. эҕэрдэлэрин тиэртилэр. Бэлиэтээбиттэринэн, бу оскуола технопааркатыгар өрүс уҥуордааҕы оройуоннар оскуолаларын үөрэнээччилэрэ эмиэ дьарктаныахтара.
Бу туһунан иһитиннэриини СӨ Үүнэр көлүөнэ тус сыаллаах пуондтын пресс-сулууспата иһитиннэрдэ.
0
0