«Майа долгуна» араадьыйа биэриилэрин ааптардара — уопсастыбанньыктар

Ааптар: 
Бөлөххө киир:

Быйыл саас Мэҥэ Хаҥалас улууһун Майа сэлиэнньэтин  баһылыга Дмитрий  Тихонов аныгы үйэ сиэринэн суотабай төлөпүөҥҥэ сыһыарыы оҥорторон,  «Майа долгуна» араадьыйа үлэтин сөргүппүтэ.

Араадьыйа саҥа тутуллубут Дмитрий Ходулов аатынан норуот айымньытын дьиэтигэр олохтонон  үлэлиир. Кэрэхсэбиллээҕэ баар, «Майа долгунугар» аҥардас муусука эрэ буолбакка, араас эйгэҕэ үлэлиир уопсастыбаннай түмсүүлэр,  нэһилиэктэр салайааччылара тахсан, араас тиэмэни сырдаталлар, кэпсииллэр. Бу туһунан «Эдэр саас» саайт уопсастыбаннай кэрэспэдьиэнэ Зиновий Игнатьев кэпсиир:
— Уопсастыбанньыктар уочаратынан араадьыйаҕа анал бириэмэлэрдээхпит. Онно бэйэбит ааптарыскай биэриилэрбитинэн тахсабыт.

Холобура, «Кэл, олор сэһэргэһиэх…» диэн дьон олус кэтэһэр биэриитин уруккуттан араадьыйанан кэпсиир уопуттаах, бу биэриини өр кэмҥэ ыыта сылдьар ытык мааны эбээ Анна Иннокентьева ыытар. Улуус кыраайы үөрэтээччилэрэ, Үһүс көлүөнэ оскуола, онтон да атын  уопсастыбаннай түмсүүлэр уочаратынан тахсан, бэрт үгүс киһи интэриэһин тардар сонуннарын кэпсииллэр. 

Мин тус бэйэм «Ахтан, санаан ааһыахха» диэн биэриилээхпин. Онно мин харыларын күүһүнэн үлэлээбит уонна үлэлии сылдьар  боростуой  үлэһит дьону сырдатабын. Ол эмиэ, туһугар, «моһуоктаах» соҕус. Дьонум үөрэ-көтө айахтара аһыллыбат, ыһа-тоҕо кэпсээн да бэрт. Сэмэйдэрэ бөҕө. Эпииргэ үлэ дьону кытта туспа сыһыаны эрэйэр.
Араадьыйа интэриниэт  баар сиригэр барытыгар хабарынан үчүгэй. Этэргэ дылы, Эмиэрикэҕэ да истиэххэ сөп. Онон «Майа долгуна» үлэтэ, истээччитэ кэҥээн истин диэн баҕа санаабын тиэрдэбин.
Кырдьык, «Майа долгунун» төлөпүөҥҥэ хачайдаан баран, истэ сылдьыахха үчүгэй эбит. Мин биир дьоруойбун бу араадьыйаны истэ олорон булан ыллым. Ол матырыйаалым кэлэр чэппиэргэ «Саха сирэ» хаһыакка тахсыаҕа.

Коронавирус сыстыганнаах дьаҥа бүрүүкээн турдаҕына, дьон ханна да сылдьыбат кэмигэр араадьыйа олохтоох салайыныы уорганнарыгар: улуус уонна нэһилиэк баһылыктарыгар, араас таһымнаах дьокутааттарга, тэрилтэлэр салайааччыларыгар, үөрэхтээһин уонна доруобуйа харыстабылын салаатын салайааччыларыгар уонна исписэлиистэригэр олус туһалааҕа чахчы. Онон Мэҥэ Хаҥалас баһылыга Дмитрий Тихонов бастыҥ холобурун — «Майа долгуна» курдук араадьыйа сыһыарыытын үлэҕэ туһаныы, кэм ирдэбилэ.

Елена ПОТОЦКАЯ, «Саха сирэ» хаһыат, edersaas.ru.

Хаартыска: ааптар түһэриитэ уонна Зиновий Игнатьев тиксэриитэ.

+1
0
+1
0
+1
0
+1
0
+1
0
+1
0
+1
0