Кулун тутар 23 күнүгэр Уус Алдан улууһун И.С. Портнягин аатынан Сыырдаах орто оскуолатыгар бастыҥ үөрэхтээх актыбыыс оҕолорго аналаах «Майаҕатта удьуордара» диэн тэрээһин буолан ааста.
edersaas.ru
Тэрээһиҥҥэ 9 оскуолаттан сүүстэн тахса үөрэнээччи кэлэн кытынна. Сыырдаах оскуолата маннык тэрээһиннэри күһүҥҥү уонна сааскы сынньалаҥнар кэмнэригэр түбэһиннэрэн үһүс сылын тэрийэр.
Сарсыарда 9.00 чааска кэлэн бэлиэтэнэн баран, кэлбит оҕолору араас хамаандаларга арааран, бэлэмнэнии үлэтэ эбиэккэ диэри ыытылынна. Эбиэт кэнниттэн бастакы түһүмэҕинэн «Доҕордоһуу биһигини сомоҕолуур» диэн хамаандалар бэйэлэрин билиһиннэриилэрин көрдүбүт. Оҕолор ырыанан, үҥкүүнэн, тэттик сыаҥкаларынан дьүөрэлээн бэйэлэрин билсиһиннэрдилэр, уҕараабат ытыс тыаһа оргуйан олордо.
Иккис түһүмэххэ эрдэттэн бэлэмнэниллибит «Вместе мы сила» диэн араас түһүмэхтэрдээх, эриирдээх-мускуурдаах оонньуулар, ыйытыкка эппиэттэр ыытылыннылар.
Үһүс түһүмэх — «90-с сыллар бастыҥ ырыалара» ток-шоу олус сэргэхтик, өрө көтөҕүллүүлээхтик ыытылынна. Оҕолор урукку кэм уостан түспэт бастыҥ ырыаларын хамаанданан толордулар, тэрийээччилэрин сөхтөрдүлэр.
Төрдүс түһүмэҕинэн хапытааннар күрэхтэрэ ыытылынна, манна эмиэ хапытааны быыһыыр туһугар көрдөөх уонна уустук оонньуулар буоллулар.
Түөрт түһүмэх кэннэ дьүүллүүр сүбэ быһаарыытынан оҕолорбут араас анал ааттарга тигистилэр:
«Саамай талааннаах»- Найахы орто оскуолатын 8 кылааһын үөрэнээччитэ Рожина Иза;
«Саамай туочунай» — Чараҥ орто оскуолатын 8 кылааһын үөрэнэччитэ Находкин Олег;
«Саамай түргэн» — Бэйдиҥэ орто оскуолатын 8 кылааһын үөрэнээччитэ Андросова Василиса;
«Саамай көхтөөх» — Чараҥ оскуолатын 10 кылааһын үөрэнээччитэ Сысолятин Аким;
«Саамай күүстээх» — Мындааба орто оскуолатын 9 кылааһын үөрэнээччитэ Пантилов Эрхан;
«Саамай артыыс » — Орто Эбэ орто оскуолатын 7 кылааһын үөрэнээччитэ Яковлев Слава;
«Саамай бастыҥ баһаатай» — Сыырдаах орто оскуолатын 9 кылааһын үөрэнээччитэ Охлопкова Дорина;
«Саамай бастыҥ хапытаан» — Чараҥ орто оскуолатын 10 кылааһын үөрэнээччитэ Сысолятин Аким;
«Бастыҥтан бастыҥ» — Дүпсүн орто оскуолатын 8 кылааһын үөрэнээччитэ Новгородова Рада.
Рада Новгородова ону сэргэ “Майаҕатта Удьуордара” диэн сүрүн бириис хаһаайынынан буолла.
Ону тэҥэ сайыҥҥы сынньалаҥ кэмигэр ыытыллар «Майаҕатта суолунан» 3 күннээх экспедицияҕа 10 путевка түҥэтилиннэ.
Тэрээһин олус бэркэ ааста. Наҕараада ылан, дьол кыымын туппут оҕолор үөрүүлэриттэн ордук дьол ама бу дойдуга баара буолуо дуо? Маннык сэргэх тэрээһини тэрийбит Сыырдаах оскуолатын лидер оҕолоругар, үлэһиттэригэр, чуолаан эбии үөрэхтээһин учууталыгар Марианна Петроваҕа, барҕа махталбытын биллэрэбит. Тэрээһиммит сылын ахсын тупсан, өссө да элбэх эдэр ыччаты үрдүккэ, кэрэҕэ угуйан, үтүмэн үйэлэр усталаах туораларыгар салалла турдун диэн алгыс тылбытын аныыбыт!
ЫСПЫРААПКА:
Номоххо кэпсэнэринэн, Майаҕатта Бэрт Хара ХVI үйэҕэ Кыыс Хаҥа сайылыкка олорон ааспыт биир күүстээх, быһый эр бэрдинэн биллэр. Ийэтэ Эбирикээн эмээхсин күүстээх-уохтаах булчут эбит. Дьиктитэ диэн, уол 16 сааһыгар диэри босхоҥ ыарыы буолан сытар, кэлин улаатан Дыгын Дархан оонньууларын муҥур кыайыылааҕынан аатырар, Дыгын Дархан саамай мааны кыракый кыыһын Тынаана Куону ойох ылар.
Игнатий СЛЕПЦОВ, “Саха сирэ”, edersaas.ru cайтка анаан