Уус Алдан улууһугар Майаҕаска, С.Г.Крылов аатынан модельнай бибилэтиэкэ оскуола үөрэнээччилэригэр, дьиэ кэргэҥҥэ аналлаах тэрээһини тиһиктээхтик тэрийэр. Олортон биирдэстэринэн, төрдүс сылын ыытыллар, Аҕа дойду сэриитин бэтэрээнигэр Е.М.Крыловка аналлаах тэрээһин ыытыллара буолар.
Тэрээһин туһунан бибилэтиэкэ сэбиэдиссэйэ Ксения Кириллина иһитиннэрдэ:
—Улуу Кыайыы 75 сылынан Аҕа дойду сэриитин бэтэрээнэ, биир дойдулаахпыт, буойун, худуоһунньук Евграф Михайлович Крылов төрөөбүтэ 105 сылынан, кэтэхтэн күрэһи интэриниэт ситиминэн тэрийэн ыыттыбыт. Манна Хоро нэһилиэгиттэн төрүттээхтэр Дьокуускайтан, Бүлүүттэн, улууспутуттан уонна нэһилиэкпититтэн кытыннылар.
Сэрии сылларыгар аналлаах хоһооннору ааҕалларын 4 оҕо видеоҕа устан ыытта. Онтон уруһуйга күрэскэ уруһуй хаачыстыбата, дириҥ ис хоһооно сыаналанна. Манна 18 кыттааччы баар. Сэрии кэминээҕи колхуос, сэрии сылларын устуоруйатын көрдөрөр, бэтэрээннэр суруктарын, малларынан баар буоллаҕына хаартыскаҕа түһэрэн, видеоҕа устан ыытыыга 4 улахан киһи олус үчүгэй хаартыскаларынан кытыннылар. «Сэрии — мин дьиэ кэргэним дьылҕатыгар» хайысхаҕа «Эһиги биһиэхэ олоҕу бэлэхтээбиккит», «Сэрии кэмин оҕолоро», «Сураҕа суох сүппүт, сэрииттэн эргиллибэтэх биир дойдулаахтарбыт», «Сэрии кэмигэр тыылга үлэлээбит мин биир дойдулаахтарым», о.д.а. тиэмэлэринэн барыта сэттэ оҕо кытынна.
Киирбит үлэлэри Крылов дьиэ кэргэттэрин сүбэтэ көрдө, сыаналаата. Кыайыылаахтарга сэртипикээттэр, бириистэр ананнылар.
Сардаана Баснаева, «Саха сирэ» хаһыат, edersaas.ru
Хаартыска, видео С.Г.Крылов аатынан модельнай бибилэтиэкэттэн