Саха сиригэр дьон көҕүлээһинин үбүлээһин эйгэтигэр Майа сэлиэнньэтигэр оптуобус тохтобулун бырайыага бастыҥынан ааттанна.
Арассыыйа Үбүн министиэристибэтин “Үп научнай-чинчийэр института” тэрилтэ дьон көҕүлээһинин үбүлээһин бырайыагар Бүтүн Арассыыйатааҕы үһүс куонкурус түмүгүн таһаарда. Куонкуруска 2018 сылга олоххо киирбит бырайыактар кытыннылар. Уопсайа 1021 сайаапкаттан иккис түһүмэххэ Арассыыйа 37 эрэгийиэниттэн 380 бырайыак киирдэ.
Кыайыылаахтары үс номинациянан (уопсастыбаннас кыттыыта, уопсастыбаннай бииргэ үлэлээһин, саамай сонун бырайыак) быһаардылар.
Саха Өрөспүүбүлүкэтэ 15 оройуоҥҥа олоххо киирбит 25 бырайыагы киллэрдэ. Маныаха Саха сирин бырабыыталыстыбата бу бырайыактары үбүлээһиҥҥэ 2018 сыллаахха 500 мөлүйүөн солкуобайы көрбүтэ.
“Майа сэлиэнньэтигэр оптуобус тохтобула” кыайыылаах бырайыак уопсай суумата – 1176100,00 солкуобай. Итинтэн 100 тыһыынча солкуобайы бөһүөлэк уйуммут. 71100 солкуобайы нэһилиэнньэ кыттыспыт. Ону таһынан өрөспүүбүлүкэ бүддьүөтэ уонна биирдиилээн спонсордар, урбаанньыттар көмөлөспүттэр.
Кыайыылаах дипломун “Майа сэлиэнньэтэ” МТ баһылыга Дмитрий Иванович Тихонов тутта.
“Көҕүлээһини өйүүр бырагырааманы дьон биһирээтэ. Былырыын Майаҕа мунньахха 1500 киһи кыттыбыт буоллаҕына, быйыл 2350 киһи кэлбитэ. Бастаан нэһилиэнньэ ортотугар ханнык бырайыагы талабыт диэн ыйытык ыыппыппыт. 2019 сылга толоруллубут 806 анкетаттан 497 киһи бөх тоҕор былаһааккалары туруоруохха диэбитэ. 440 киһи Сыроватскай уулуссатыгар тротуары оҥорууну, 479 ыйытыллыбыт киһи Ытарҕалааҕы туоруур муостаны туруорсубута”, — диэтэ баһылык.
Онон Ытарҕалаах муостата быйыл балаҕан ыйыгар оҥоһуллубута. Онно нэһилиэнньэ уопсайа 150 тыһыынча солкуобайынан кыттыспыта.
Бу дьон көҕүлээһинин өйүүр бырагырааманан өрөспүүбүлүкэҕэ 3 сыл устата үгүс кыһалҕалаах боппуруостары быһаардылар.
Билигин куораттарга уонна нэһилиэктэргэ 2020 сыллааҕы бырайыактары олоххо киллэриигэ анаммыт мунньахтар ыытыллаллар. 2020 сылга олохтоох көҕүлээһиннэри өйүүргэ 500 мөл. солкуобай көрүлүннэ.
СӨ Үп министиэристибэтин пресс-сулууспата
Женни Стрюкова бэлэмнээтэ.