Маны аах Үөрэх уонна наука

Майаҕа оҕолорго технопаарка аһылынна

Мэҥэ Хаҥалас улууһун Майа сэлиэнньэтин лицейин баазатыгар алтынньы 10 күнүгэр «Сайдыс” технопаарка аһылынна. Лицей дириэктэрэ Татьяна Попова бэлиэтииринэн, бу үөрүүлээх тэрээһиҥҥэ кинилэр аҕыс сыл анараа өттүттэн бэлэмнэммиттэр эбит. Аҕыс сыллааҕыта оскуолаҕа тиэхиньиическэй хайысхалаах анал куруһуок тэриллэн, ону сэргэ атын оскуолалары кытта интэриниэт ситимин нөҥүө ыкса сибээстэһэр буолбуттар.

— Билигин “Үүнэр көлүөнэ пуондатын” өйөбүлүнэн биһиги урукку баҕа санаабыт туолла. Технопааркабытыгар барыта аныгылыы тэрил кэлэн, оҕолорбутун сайыннарарга, идэҕэ туһаайарга үгүс үлэлэр ыытыллыахтара. Маннык үчүгэй усулуобуйаҕа оҕолорбут уонна учууталларбыт саамай хорсун идиэйэлэрин, бырайыактарын олоххо киллэриэхтэрэ, — диэн дириэктэр Татьяна Попова санаатын үллэһиннэ.

Бэлиэтээн эттэххэ, бу «Үүнэр көлүөнэ пуондатын» чэрчитинэн  оҕолорго аналлаах бастакы технопаарка буолар. Бу бырайыак 2021-2023 cc «Во имя будущего» диэн пуонда бырагырааматын нөҥүө олоххо киирдэ.
СӨ Ил Дархана Айсен Николаев  «Саха Өрөспүүбүлүкэтигэр үөрэхтээһиҥҥэ стратегическэй хайысхалары сайыннарыы» диэн ыйааҕынан 2024 сылга диэри маннык технопааркалар хас биирдии оройуон киинигэр уонна куорат уокуругар баар буолуохтаахтар.

— Биһиги координатор быһыытынан оҕо технопааркалара, атын инновационнай кииннэр өрөспүүбүлүкэҕэ элбээн үгүс оҕону, ону таһынан улууска олорор оҕолору хабан сайыннаралларыгар дьулуһабыт. Аныгы экэниэмикэҕэ үрдүк таһымнаах каадырдары бэлэмнииргэ биир саамай сүрүн усулуобуйабыт бу буолар, — диэн бэлиэтээтэ «Үүнэр көлүөнэ пуондатын” генеральнай дириэктэрэ Владимир Егоров.

Ульяна ЗАХАРОВА. edersaas.ru

1
0