Муус устар 6 күнүгэр Мэҥэ Хаҥалас улууһун киинигэр Майаҕа эмиэ биир кэрэхсэбиллээх, ураты, умнуллубат айан-сырыы буолла.
Майаҕа мэҥэлэр ньиргиччи уонна айымньылаахтык үлэлиир Итэҕэл балаҕаннаахтар. Онно сахалыы санааны аһаҕастык атастаһар тэрээһиҥҥэ Дьокуускайтан Арассыыйа Үрдүкү Ойуунун солбуйааччыта, эмчит Лэгэн Лэгэнтэй, саха түмсүүлэрин түмээччи Иннокентий Макаров-Лэгэнтэй Боотур уонна уйулҕаһыт, көрбүөччү Татьяна Ксенофонтова-Харыстаана буолан кытынныбыт.
Көрсүһүүнү алгысчыт Зиновий Игнатьев иилээн-саҕалаан, бэркэ ыытта. Майаттан уонна нэһилиэктэртэн саха итэҕэлин, түмсэрин туһугар долгуйар-ыалдьар дьон мустубута бэлиэ — санааны атастаһыы, сэһэргэһии сэргэхтик, интэриэһинэйдик, быыһыгар, бэл диэтэр, тыҥаан ыла-ыла, барда.
Тэрээһин биир бэлиэ түгэнинэн Лэгэн Лэгэнтэй ыалдьыт быһыытынан ыҥырыллыбыт Хара бөһүөлэгин олохтооҕо, «Өбүгэ ситимэ» өрөспүүбүлүкэтээҕи түмсүү салайааччыта Одун Элиэнэ-Куорсуннаах удаҕаҥҥа «Якутлесресурс» аатыттан «Махтал суругу» туттарбыта буолла. Ис хоһооно — ааспыт сайын турбут ойуур баһаардарын умуруорууга айылҕаҕа күүстээх үлэни тэрийэн ыыппытыгар махтанан диэн.
Көрсүһүү иккис чааһыгар төгүрүччү атах тэпсэн олорон, ирэ-хоро сэһэргэһии кэмигэр, Лэгэн Лэгэнтэй киниэхэ көмөҕө наадыйан кэлбит дьону ыраастаата, эмтээтэ.
Ити кэнниттэн куораппытыгар айанныах иннинэ Одун Элиэнэ саҥа балаҕаныгар сылдьан, итии үттүээх чэй иһэ-иһэ, айылҕаттан айдарыылаахтар тустарынан, былыргыттан быйылгыга диэри сэһэн-сэппэн бөҕөтө буоллубут.
Маннык ураты күн саҕаҕа да ураты кэрэ буолла — ону Үрдүк Айыылар бэлэхтэрин, алгыстарын быһыытынан, махтана ылынныбыт.
Вера Макарова-Чугдаарыйа, суруналыыс.
2022 с. муус устар 6 күнэ, Майа с.