Mail.ru Group Арассыыйа үөрэнээччилэрин “Сыыппара уруогар” нейрон тиһиктэринэн үлэлииргэ үөрэтиэҕэ
Үөрэнээччилэри туохха үөрэтэллэрий?
Сэтинньи 23 күнүттэн ахсынньы 13 күнүгэр диэри “Сыыппара уруоктара” үөрэх бырайыагын саҥа түһүмэҕэ саҕаланыаҕа. Тиэмэтэ — “Нейрон тиһиктэрэ уонна коммуникациялар”. Үөрэнээччилэр нейрон тиһиктэрэ хайдах үлэлииллэрин, дьон сибээстэһэригэр хайдах туһанылларын үөрэтиэхтэрэ.
Бу саҥа дьарыктары тустаах бөлөх “Алгоритмика” математика уонна бырагыраамалааһын оскуолатын кытта ВКонтакте и Одноклассники ситимнэргэ туһаныллар технологияларга олоҕуран бэлэмнээтэ.
“Сыыппара уруога – бу үөрэтэр бырайыак, бу көмөтүнэн үөрэнээччилэр сүрүн технологическай хампаанньалартан билиини ылыахтара уонна сыыппара экэниэмикэтин компетенцияларыгар үөрэниэхтэрэ. “Сыыппара уруоктара” бырайыак анал тренажердарыгар үс бөлөҕүнэн оҕолорго онлайн-оонньуу курдук барыаҕа. Уруокка оҕолор нейротиһик технолологияларын билсиэхтэрэ. Ханна үөрэнэллэрин, ханнык эйгэлэргэ туһаныллалларын билиэхтэрэ.
Бу уруоктар кэмнэригэр видео-лиэксийэлэр, идэҕэ бэлэмниир тиэстэр уонна онлайн-тренажердар ыытыллаллар. 11 кылааска диэри бары үөрэнээччилэр уруокка тэйиччиттэн үөрэниэхтэрэ, онно төрөппүттэрэ уонна учууталлар көмөлөһүөхтэрэ.
Ону сэргэ туһанааччылар интэриэстэринэн сонуннары сүүмэрдииргэ үөрэниэхтэрэ. Оттон үрдүк кылаас оҕолоро сыһыарыылары оҥорууга нейротиһик хайдах туһанылларын көрүөхтэрэ.
”Сыыппара уруогар” баҕалаахтар компьютерынан, смартфонунан эбэтэр планшетынан кыттыахтара.
Кэнники уон сылга Mail.ru Group IT-үөрэҕи сайыннарар.
Нейрон тиһиктэрэ араас салааларга туһаныллаллар.
“Биһиги бу уруоктарга араас саастаахтары кытыннарабыт. Үөрэнээччилэри кинилэр тылларынан-өстөрүнэн кэпсэтэн эрэ саҥа технологияларга интэриэһи тардыахха сөп”, — диир тустаах хампаанньа генеральнай дириэктэрэ Борис Добродеев.
“Үөрэнээччилэр үгүстүк араас интэриниэт-ресурсаларынан уонна бырагыраамаларынан туһаналлар эрээри, бу ханнык салааҕа туһанылларын билбэттэр. Mail.ru Group курдук хампаанньалар педагогическай уонна технологическай быһаарыылары тэҥҥэ тутан, оонньуу көрүҥүнэн уустук тиэмэлэри быһаараллар, оҕолору бэйэлэрин эйгэлэригэр тардаллар уонна талыахтаах идэлэригэр суолу арыйаллар”, — диэн үөрэх миниистирэ Сергей Кравцов эттэ.
“Сыыппара уруога” үөрэх бырайыага 2018 сыл ахсынньы ыйга РФ Үөрэххэ министиэристибэтин, РФ Сибээскэ министиэристибэтин уонна “Сыыппара экэниэмикэтэ” тэрилтэ көҕүлээһиннэринэн саҕаламмыта. Бырайыак соругунан үөрэнээччилэри цифровой крмпетенцияларга сыһыарыы уонна идэҕэ эрдэттэн бэлэмнээһин буолар. 2020-2021 сыллааҕы үөрэх дьылыгар бырайыак партнердарынан Сбербаан “Инникигэ кылаат” аһымал пуондата, Яндекс хампааньалар, «1С», Mail.ru Group, «Лаборатория Касперского» буолаллар.
Технологическай өттүнэн көмөлөһөөччүлэр – “Кодвардс” үөрэтэр бырагыраама уонна “Алгоритмика” бырагыраамаҕа үөрэтэр оскуола. Иһитиннэрэр партнердар — VK уонна Россотрудничество.
Бырайыак Арассыыйа 85 эрэгийиэнин хабар.
Бэлэмнээтэ Женни Стрюкова
Хаартыска: интэриниэттэн