13 сыл устата бэлиэтэнэр бырааһынньыктарын Өймөкөөн улууһун киинин Уус Ньара бөһүөлэгин урбаанньыттара быйыл улуус дьаһалтатыгар үөрүүлээх быһыыга-майгыга бэлиэтээтилэр.
edersaas.ru
Сыстыганнаах дьаҥ өрө турбут кэмэ буолан, тэрээһиҥҥэ бары санитарнай нуорма толору тутуһулунна. Улуус баһылыга Иннокентий Сивцев уонна улуус дьокутааттарын Мунньаҕын сэбиэтин салайааччыта Татьяна Алферова Өймөкөөн оройуонун социальнай сайдыытыгар өрүү бэйэлэрин кылааттарын, өйөбүллэрин киллэрэ олорор урбаанньыттар ааттарын дорҕоонноохтук ааттаатылар.
Зафар Ачилов, Айталина Дягилева, Лидия Шалина, Муслимат Халитуева, Армен Меликсетян, Галина Зарянская, Татьяна Горон, Иванна Атласова, Марина Лунцова, Хавра Бочаева, Ольга Кузнецова курдук урбаанньыттар улуус дьаһалтатын бары тэрээһиннэригэр актыыбынай кыттыыны ылаллар, өрүү бириистэринэн уонна сыаналаах бэлэхтэринэн өйүүллэр.
— Эһиги уустук усулуобуйалаах ыраах хотугу оройуоҥҥа, Тымныы полюһунан аатырар Өймөкөөн сиригэр бэйэ дьыалатын арынанан тахсыылаахтык үлэлии-хамныы, биир дойдулаахтарыгытын аһынан-үөлүнэн, таҥаһынан-сабынан хааччыйа олороҕут. Улууспут социальнай-экэнэмиичэскэй сайдыытыгар бэйэҕит дьоһуннаах кылааккытын киллэрэҕит. Өрөспүүбүлүкэ Ил Дархана Айсен Николаев сыстыганнаах дьаҥ турбут кэмигэр улуус урбаанньыттара кырдьаҕас дьоҥҥо, элбэх оҕолоох ыалларга өйөбүлгүт иһин истиҥ махталын тиэрдэр. Бу маннык уустук кэмҥэ биһиги бары күүспүтүн холбоотохпутуна, бары ыарахаттары кыайыахпыт, — диэн этэн туран, баһылык Иннокентий Сивцев Улуу Кыайыы 75 сылын бэлиэтээһиҥҥэ уонна сыстыганнаах дьаҥ пандемията турбут кэмигэр бэйэлэрин кыахтарынан өйөбүл буолбут уонна өрүү көмөлөһөр урбаанньыттарга Ил Дархан Айсен Николаев уонна оройуон салалтатын Махтал суруктарын туттарда.
Бүгүҥҥү күҥҥэ улууска 279 бэйэ дьыалатын тэринэн үлэлиир урбаанньыт баар. 119 — бөдөҥ хааччахтаммыт эппиэтинэстээх уопсастыбалар (сүрүннээн көмүс хостуур тэрилтэлэр). Улууска атыы-эргиэн, курууһу уонна пассажирдары тиэйии, көмүс хостооһуна, туризм салааларын көрүҥнэрэ ордук сайдаллар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Галина Шалаева түһэриитэ.