Маҕараска «ODUNU FEST» ыччат бэстибээлэ биир санаалаахтары түмтэ

Ааптар:  Горнай улууһун дьаһалтатын пресс-сулууспата
Бөлөххө киир:
Хаартыска: Горнай улууһун дьаһалтатын пресс-сулууспата

Бэс ыйын 3 күнүгэр Горнай улууһун Маҕарас нэһилиэгэр иккис төгүлүн «ODUNU FEST” олохтоох түмсүүлэр бэстибээллэрэ үрдүк таһымнаахтык буолан ааста. 

Бэстибээлгэ тыа сирин уларытарга тутуу идиэйэлэрин кэрэхсиир, көҕүлүүр дьон түмүстэ. Манна олохтоох түмсүүлэр уопут атастастылар, биир санаалаах дьону кытта алтыһан, саҥаны, сонуну олохтуур тула аһаҕас кэпсэтиилэр, панельнай дискуссиялар буоллулар.

Тэрээһиҥҥэ Горнай улууһун баһылага Никита Андреев, СӨ ыччат миниистирэ Петр Шамаев, Санкт-Петербург куораттан түмсүүлэр киинин салайааччыта, ыччат эко-систиэмэлэри, дьылабыай түмсүүлэри сайыннарыыга уонна оҥорууга эспиэр Максим Никитский уо.д.а. ыалдьыттар кыттыыны ыллылар.

Атыы-эргиэн, ас атыыта, кафе туочукалара үлэлээтилэр.

Дьокуускайдааҕы «Детская точка кипения» салайааччыта Елена Лукина: «Горнай дьоно-сэргэтэ ыалдьытымсахтар, биһигини олус үчүгэйдик көрүстүлэр. Быйыл «ODUNU FEST» бэстибээлгэ бастакыбытын кытынныбыт, түөрт буолан хамаанданан кэллибит. Биһиги «Кумааҕыга иккис тыынна биэр» диэн маастар-кылаас ыыттыбыт. Дискуссия түһүлгэтигэр тыа сирин хайдах сайыннарыахха сөбүй диэҥҥэ араас санаалары иһиттибит. Манна мустубут дьон бэртээхэй идиэйэлээхтэр, сайдам санаалаахтар, ураты көрүүлээхтэр, ону олоххо киллэрэргэ кыһаллаллар».

Одуну нэһилэгин баһылыга Владимир Текеянов: «Кэнники сылларга тыа сиригэр ыччат олохсуйуута, тыа сириттэн көһүү улахан кыһалҕа буолан эрэр. 40-50 сылынан тыа сирэ хайдах буолуой, кэхтэр түгэнигэр биһиги норуот быһыытынан инникибит хайдах буоларын ырытыһарга панельнай дискуссияҕа кыттыны ыллыбыт».

Улуус баһылыгын бирииһигэр ГТО нуормаларын туттарыыга күрэхтэһии буолла. Сүрүн бириис — 100 000 солк.

I миэстэ — «Эдьигээн», Эдьигээн улууһа.
II миэстэ — «Форсаж», Дьокуускай.
III миэстэ — «Бэрдьигэс», Бэрдьигэстээх.

СӨ Үлэ сылын чэрчитинэн, Афанасий Осипов төрөөбүтэ 95 сылынан Горнай улууһун ыччат уопсастыбаннай түмсүүлэрин икки ардыларынан театрализованнай дьүһүйүүгэ уонна аныгы үнкүүгэ күрэстэр ыытылыннылар.  Атамайтан «Анык», Кировскайтан «Эрчим», Одунуттан «Эрэл», Октябрьскайтан «МСИДОТ», Бэрдьигэстээхтэн  «Добун» ыччат түмсүүлэрэ кытыннылар. Куонкурус сыл устата түөрт түһүмэҕинэн ыытыллар. Салгыы Бэрдьигэстээххэ уонна түмүктүүр түһүмэх Солоҕоҥҥо буолуохтара.

Хаартыска: Горнай улууһун дьаһалтатын пресс-сулууспата

Ыччат бэстибээлэ саха «сулустарын» кэнсиэринэн, опен-эйрынан уонна уоттаах-күөстээх дискотеканан түмүктэннэ. Ырыаһыттар Jeedda, Ponsash&Fiesta, Умсуура, Кэскил Баишев, DJ ICENJack толоруулара киэһэни киэргэттилэр. Дмитрий Баишев уонна Альберт Ноговицын өрө күүрүүлээхтик кэнсиэри ыыттылар.

+1
5
+1
0
+1
0
+1
0
+1
0
+1
0
+1
0