Кулун тутар 12 күнүгэр Маҕан бөһүөлэгэр бырабыыталыстыба ааспыт сыллааҕы үлэтин отчуота ыытылынна. Олохтоохтору кытта вице-премьер Денис Белозеров баһылыктаах оробуочай бөлөх көрүстэ.
Дьону хаарбах уонна сууллар туруктаах дьиэлэртэн көһөрүү туһунан ыйытыыга хоруйдууругар, Бырабыыталыстыба Бэрэссэдээтэлин солбуйааччы Денис Белозеров, өрөспүүбүлүкэҕэ 2018 сылга маннык туруктааҕынан 2012 сыл тохсунньу 1 күнүгэр диэри билиниллибит дьиэ фондатыттан толору көһөрдүлэр диэн бэлиэтээтэ. 490,4 тыһ. кв.м. саахалланар туруктаах дьиэ көтүрүлүннэ, 29736 киһини көһөрдүлэр.
Дьокуускайга саахалланар туруктаах дьиэлэр ахсааннарыгар 226 элбэх кыбартыыралаах олорор дьиэ киирбитэ. Чуолаан, Маҕан бөһүөлэгэр сууллар туруктаах уопсайа 245,4 кв.м. иэннээх икки дьиэттэн дьону көһөрдүлэр.
2019 сыл тохсунньу 1 күнүнээҕи туругунан, Дьокуускайга саахалланар туруктааҕынан 331 элбэх кыбартыыралаах дьиэ билинилиннэ, ол иһигэр Маҕан бөһүөлэгэр – 586,05 кв.м. уопсай иэннээх түөрт элбэх кыбартыыралаах дьиэ.
Маҕан олохтоохторо мелиорация, уматык сыанатын, саҥа спорт саалатын уонна оскуола салҕааһынын тутуу, уунан хааччыйыы туһунан ыйыттылар. Маҕаннар бырабыыталыстыба 2018 сыллаах үлэтин биһирээтилэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.