Муус оҥоһуктарга күрэстэр улахан дьону сэргэ, оҕолорго эмиэ ыытыллаллара олус үчүгэй, туһалаах. Оҕо айа-тута, толкуйдуу, тобула, уопсай тылы була уонна хамаанданан үлэлии үөрэнэр дииллэр таатталар үөрүүлээх сонуннарын саҕалыылларыгар.
Ытык Күөл 1 №-дээх оскуолатын 9-с кылааһын үөрэнээччитэ Эрчимэн Игнатьев уонна Ытык Күөл 2 №-дээх оскуолатын 9-с кылааһын үөрэнээччитэ Леня Поленов Магадаҥҥа XIV төгүлүн ыытыллыбыт норуоттар икки ардыларынааҕы «Магадан курустаала» муус оҥоһуктар күрэстэригэр кыттан, «Эдэр скульптордарга» «За лучшее техническое исполнение» кыайыылааҕынан буолбуттар. Уолаттар муустан оҥоһуктарын «Оҕо саас» диэн ааттаабыттар. Оттон салайааччылара, «Эрэл» саастарын ситэ илик оҕолору реабилитациялыыр киин педагога Василий Тистяхов Мэҥэ-Хаҥаластан тиийбит Дьулустаан Марковтыын муус оҥоһукка «Маастардар» кэккэлэригэр бастаабыттар. Үлэлэрин «Под Полярной звездой» диэн ааттаабыттар. Магадан куорат дьаһалтата хамаандалар үлэлэрин «чахчы да курустаал таастан оҥоһуллубут киэргэл курдук олус кэрэ, киһини долгутар» диэн үрдүктүк сыаналаабыт.
Василий Тистяхов: — Улууспутугар муус оҥоһуктарга күрэхтэһиини иккитэ тэрийдибит. Уоннуу хамаанда кыттар. Хамаандаҕа иккилии үөрэнээччи уонна биирдии педагог киирэр. Ленялаах Эрчим улууска кыттан бириистээх миэстэлэри ылаттаабыттара. Былырыын Дьокуускай куорат 202 түөлбэтигэр ыытыллыбыт муус оҥоһуктар күрэстэригэр эмиэ анал ааты ылан тураллар. Уолаттарбыт мууһу чочуйарга үөрүйэхтэнэн иһэллэрэ көстөр. Магадаҥҥа улахан дьон курдук дьоһуннаахтык кытыннылар. Маладьыастар. Наһаа үөрдүм, — диэн санаатын үллэһиннэ.
Күөн күрэс түһүлгэтигэр Санкт-Петербуртан, Ижевскэйтэн, Хабаровскайтан, Свердловскай, Москва уобаластарыттан, Минскэйтэн (Белоруссия), Саха сириттэн уонна магаданнар бэйэлэрэ түмсэн үс күн күрэхтэспиттэр.