Бу күннэргэ “Модун” Спорт киинигэр атырдьах ыйын 17-19 күннэригэр Азербайджан киин куоратыгар – Бакуга ыытыллыбыт мас тардыһыытыгар Европа чөмпүйэнээтин түмүгүнэн пресс-кэмпириэнсийэ буолла.
Бу күрэхтэһиигэ сүрүннээн саха мадьыныларыттан турар Арассыыйа сүүмэрдэммит хамаандата уон кыһыл көмүс, биир үрүҥ көмүс мэтээли ылары ситиһэн, хамаанданан түмүккэ бастакы миэстэҕэ таҕыста. Икки кыһыл көмүс, биэс үрүҥ көмүс, биэс боруонса наҕараадалаах венгрдар — иккис, онтон хаһаайыттар, Азербайджан спортсменнара, үһүс буоллулар (үс үрүҥ көмүс, уон биир боруонса мэтээллээхтэр).
Европа чөмпүйэнээтин кыайыылаахтарынан эр дьоҥҥо буоллулар: 60 кг — Айсен Мигалкин (Арассыыйа, Саха сирэ), 75 кг — Афанасий Платонов (Арассыыйа, Саха сирэ), 80 кг — Дьулуур Климовскай (Арассыыйа, Саха сирэ), 90 кг — Владимир Трофимов (Арассыыйа, Саха сирэ), 105 кг —Виктор Докалов (Арассыыйа, Саха сирэ), 125 кг — Эрчим Баппаҕай (Арассыыйа, Саха сирэ), 125 кг үөһэ — Виктор Колибабчук (Арассыыйа). Дьахталлар ортолоругар 55 кг — Кэрэчээнэ Бродникова (Арассыыйа, Саха сирэ), 65 кг —Анна Окорокова (Арассыыйа, Саха сирэ), 75 кг — Horog Eniko (Венгрия), 85 кг — Vanessa David (Венгрия) уонна 85 кг — Светлана Тихонова (Арассыыйа) пьедестал үрдүкү үктэлин дабайдылар.
Көрсүһүүгэ Арассыыйа сүүмэрдэммит хамаандатын сүрүн тириэньэрэ Николай Константинов күрэхтэһии үрдүк таһымнаахтык ыытыллыбытын бэлиэтээтэ. Континент түһүлгэтигэр саха мадьынылара үчүгэйдик кыттыбыттарын ыйан туран, балаҕан ыйыгар кинилэри икки улахан күрэхтэһии күүтэрин эттэ: Киргизияҕа кочевниктар III аан дойдутааҕы оонньуулара уонна Владивостокка «Колмар» хампаанньа бирииһигэр норуоттар икки ардыларнааҕы турнир. Ону тэҥэ сүрүн болҕомто сэтинньи ый эргэтигэр Дьокуускайга буолар аан дойду чөмпүйэнээтигэр туһуланарын ыйда.
Роман Попов, edersaas.ru
Ааптар хаартыскаҕа түһэриилэрэ.