«Бэйэҥ илиигинэн оҥорбут оҥоһугуҥ – дууһаҥ көстүүтэ». Бу тыллары Дьокуускай куоракка олорор, Ньурбаттан төрүттээх, талааннаах уран тарбахтаах Далбар хотуна Евгения Попова бэйэтин үлэтигэр тутуһар.
Кини куйаар ситим нөҥүө биллиилээх маастар Анджела Габышева-Токарева үлэлэриттэн үөрэнэн, сахалыы киэргэли оҥоруунан быйылгыттан дьарыктанан эрэр. Билигин дьоҕура сайдан, дьон сакааһынан араас симэхтэри оҥорон атыылыыр буолбут.
Евгения оҥоһуктара – бастыҥа, илин-кэлин кэбиһэр, ытарҕа – барыта сахалыы тыыннаах, киһи хараҕын сылаанньытар. Кини үлэлэригэр айылҕа кэрэтэ, норуоппут үгэстэрэ, итэҕэлэ кытта иҥэн сылдьар курдук. Бу симэхтэр күннээҕи таҥаскар эбии киэргэл, ураты истиил буолан байытыахтара.
Евгения үлэлэрин ВКонтакте бу бөлөххө сигэнэн киирэн көрүөххүтүн сөп: https://vk.com/club220407112
Бүгүн кини эдэр ыччаты уһуйаары, сахалыы тыыннаах брошь оҥорор ньыматын кытта маастар-кылааһын үллэстэр.
Бэйэҥ боруобалаан көрөргөр туох нааданый?
- Араҕас уонна фиолетовай өҥнөөх оҕуруо;
- Кытаанах (от күөх) уонна сымнаҕас (араҕас, от күөх) канитель;
- От күөх (2 мм) уонна фиолетовай (2,5 мм) өҥнөөх көмүстэрдээх лиэнтэ;
- 3 мм кээмэйдээх пайеткалар;
- Брошь уруһуйа;
- 3 см кэтиттээх брошь иилинньигэ;
- Брошь олоҕун бөҕөргөтөргө хортуон;
- Брошь быһыытын туттарыыга кытаанах пленка;
- Брошь кэннин тигэргэ чараас тирии (искусственная кожа);
- Инньэ, мононить — тигэргэ аналлаах сап.
Бу матырыйааллары туһанан бэйэҥ ураты киэргэли оҥорон таһаарыаххын сөп. Тургутан көр, ай-тут, сахалыы кэрэни тарҕат.