Дьокуускай куоракка Арассыыйаҕа Ийэлэр күннэринэн тэрээһиннэр тиһиктээхтик салҕаннылар. Холобур, Губинскай уокурукка ыытыллыбыт «Женское здоровье, красота и молодость» маастар-кылаас болҕомтону улаханнык тардыбыт.
Ийэлэргэ анаан дьахталлар сэбиэттэрин бэрэссэдээтэлэ, психолог Александра Залина бэйэтин ааптарыскай маастар-кылааһын ыытта диэн иһитиннэрэллэр уокурук управлениетыттан. Өрүү буоларыныы, бырааһынньык куорат Дууматын дьокутаата, уокурук Уопсастыбаннай сүбэтин бэрэссэдээтэлэ Владислав Дмитриев истиҥ эҕэрдэтиттэн саҕаламмыт.
Салгыы бырааһынньыктыы киэргэнэн-симэнэн, үөрэн-көтөн кэлбит ийэлэр болҕомтолорун маастар-кылаас тардыбыт. Ийэ санаатын хайдах бөҕөргөтөрүн, көтөҕөрүн, үөрэ-көтө настарыанньалаах сылдьарын, бэйэтигэр болҕомтотун уурарын, тулатыгар ил-эйэ буоларын, олоҕо эргиччи тапталынан арыалланарын туһугар кини тугу гыныахтааҕын туһунан бэрт истиҥ кэпсэтии тахсыбыт. Тэрээһиҥҥэ мустубут ийэлэр тыҥааһыннаах кэмҥэ хайдах холкутуйары, бэйэ ис кыаҕын хайдах уһугуннарары кэпсэппиттэр. Ону сэргэ, кэрэ буолуу кистэлэҥин, этэҥҥэ доруобай сылдьыы, эдэр, эрчимнээх буолуу туһунан сүбэлэри истибиттэр.
Губинскай уокурук управлениета, түмүккэ тэрээһин бары кыттыылаахтара Александра Залинаҕа туһалаах маастар-кылааһы ыыппытыгар махтаммыттарын бэлиэтиир. «Дьиэ кэргэн олоҕо ийэттэн тутулуктаах» диэн санаанан үөрүүлээх тэрээһиннэрин түмүктээбиттэр.