Ахсынньы 30 күнүгэр Ил Дархан Айсен Николаев тэлэбиидэнньэ быһа эпииригэр сыл түмүктэрин таһаарда, үүнэр сылга үлэни-хамнаһы торумнаата.
— Айсен Сергеевич, эпидемиологическай балаһыанньа салгыы хайдах буолуоҕай, “үһүс долгуҥҥа” төһө бэлэмнээхпитий?
— “Иккис долгун” кэннэ, ыарыы арыый мөлтүү быһыытыйбытыгар, дьон холкутуйбут, маасканы кэппэт буолбуттар. Ол гынан баран, вирус мөлтөөбөтө, уруккутун курдук баар. Биһиги өрөспүүбүлүкэбитигэр 400-чэкэ киһи бу уодаһыннаах ыарыыттан тыына быһынна. Коронавирус мөлтөөбөтө, ону өйдүөхпүтүн наада. Ол иһин харыстанар миэрэлэри умнуо суохтаахпыт. Дьиҥэ, ирдэнэр миэрэлэр элбэҕэ суохтар ээ.
“Үһүс долгун” олунньуга, кулун тутарга кэлэрэ күүтүллэр. Бастакы, иккис “долгуннартан” уратылара диэн, “үһүс долгун” кэлэригэр вакциналаах, бэлэмнээх буолуохпут. Арассыыйаттан икки вакцина бэриллиэҕэ. Биһиги өрөспүүбүлүкэбит дойдуга биир бастакынан быһыыны ылан саҕалаабыта. Бастатан туран, дьон олоҕун быыһыыр миэдиктэргэ бэриллэр. Түгэнинэн туһанан, кинилэргэ махтаныахпын баҕарабын. Миэдиктэр үчүгэй үлэлэрин түмүгэр Уһук Илиҥҥэ уонна Арассыыйаҕа бастыҥ көрдөрүүлээхпит.
Маассабай быһыыны биэриини олунньуга саҕалыахпыт. Билигин улуустарга бэлэмнэнии үлэтэ ыытыллар. Бастаан миэдиктэр, “Роспотребнадзор” үлэһиттэрэ, социальнай тэрилтэлэр, быраабы көмүскүүр уорганнар үлэһиттэрэ, дьону кытары хантаактаһар исписэлиистэр ылыахтара. Билигин сааһырбыт дьон ылыахтарын сөп диэн көҥүллэммитэ олус үчүгэй.
Олунньуга уонунан буолбакка, сүүһүнэн тыһыынча устуука быһыы кылгас кэм иһигэр бэриллиэҕэ. Ол мэдиссиинэ тэрилтэлэрин үлэлэриттэн тутулуктаах. Нэһилиэнньэ 60%-на ылыа дии саныыбын. Быһыыны ылыы баҕа өттүнэн буолуоҕа, — диэн Айсен Сергеевич хоруйдаата.
Ангелина Васильева, «Саха сирэ» хаһыат, edersaas.ru
Хаартыска: sakha.gov.ru