Бэс ыйын 2 күнүттэн Саха сиригэр коронавируснай инфекцияҕа эпидемиологическай балаһыанньа тупсубутунан, маасканы булгуччулаах кэтии ирдэбилэ тохтоото. Тустаах ыйаахха Ил Дархан Айсен Николаев илии баттаата.
Быһаарыыны СӨ кылаабынай санитарнай бырааһын кытары сөбүлэһэн ылыннылар. Коронавируснай инфекциянан ыалдьыы таһыма билиҥҥитэ намтаан иһэр. Өрөспүүбүлүкэҕэ күннэтэ 40-50 киһи ыалдьар, ол иһигэр киин куоракка 20-чэ киһи, бу дьоҥҥо ыарыы чэпчэкитик ааһар.
Маасканы булгуччулаах кэтии эрэсиимэ билигин үгүс эрэгийиэннэргэ, ол иһигэр Москваҕа, Санкт-Петербурга, тохтотуллан турар.
Манна даҕатан эрдэххэ, бу иннинээҕи күннэргэ дьон элбэхтик тоҕуоруһар сирдэригэр — маҕаһыыннарга, тэрилтэлэргэ, оптуобустарга дьон үксүгэр маасканы кэппэт буолбуттар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.