Маасканы, бэрчээккини кэтэ сылдьыҥ
· - Олох-дьаһах

Маасканы, бэрчээккини кэтэ сылдьыҥ

Маасканы, бэрчээккини билигин да кэтэ сылдьыҥ диэн сүбэлииллэр.

Коронавирус дьаҥа туруоҕуттан, хаһыс да ыйбытын бэйэни хааччахтанан олорууну сэргэ, мааскалаах, бэрчээккилээх сылдьарбытын ирдииллэр, сүбэлииллэр. Ол сөп. Ыарыыны тарҕаппат, намтатар туһугар маннык миэрэлэр ылыллаллар. Бу туһунан СӨ Доруобуйа харыстабылын министиэристибэтэ өйдөтүү үлэтин тиһиктээхтик тэрийэр.

Тустаах министиэристибэ сүрүн инфекциониһа Снежана Слепцова: «Билигин даҕаны мааскалаах, бэрчээккилээх сылдьар наада. Тоҕо диэтэххэ, дьон маҕаһыыҥҥа сылдьара, оптуобуһунан айанныыра элбэх. Оттон элбэх киһиэхэ бу дьаҥ сибикитэ билиннэрбэккэ сылдьыан сөп. Онон билбэккэ да сылдьаннар, дьаҥы тарҕатааччы буолан хаалыахтарын сөп. Оттон мааска, бэрчээкки, салгынынан, хантаагынан бэриллэр дьаҥтан харыстыыр«, — диэн этэр.

«Онон дьаҥтан көмүскүүр сириэстибэлэринэн булгуччу туһанаргытыгар сүбэлиибин. Тус бэйэҕит, чугас дьоҥҥут олохторун, доруобуйаҕыт, этэҥҥэ сылдьаргыт туһугар. Бэрт кыратык да ирдэбили аахайбат, миэрэни тутуспат буолуу охсуулаах буолан тахсыан сөп«, — диэбит нфекционист. Оҕолорго ирдэбиллэр эмиэ тутуһуллуохтаахтарын эппит. Атырдьах ыйын 14 күнүгэр диэри хааччахтааһын миэрэлэрэ уһатыллыбыттарынан, оҕолору элбэх киһи мустар сиригэр, уулуссаҕа сырытыннарбат ордугун бэлиэтээбит.

Биирдэ кэтиллэр мэдиссиинэ мааскатын икки чаас эрэ кэтиэхтээххин. Оттон таҥастан тигиллибит элбэхтэ кэтиллэр маасканы, хас кэттэҕиҥ ахсын сууйан, өтүүктээн иһиэхтээххин. Бэрчээккини биирдэ кэтиллэри (нитрил) сүбэлииллэр. Ону да, эмиэ икки чаас кэтэҕин. Маннык бэрчээккини кэтэ сылдьар кэмҥэр, илиигин антисептигынан соттуохтааххын. Оттон таҥас бэрчээккини күнү быһа кэтиэххэ сөп диэн этэллэр.

СӨ Доруобуйа харыстабылын министиэристибэтэ гириип, тымныйан ыалдьыы сибикитэ билиннэ да, дьиэҕититтэн ханна да барбакка эрэ, тута бырааһы ыҥыраргытыгар сүбэлииллэр.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

4 × 3 =