«Коронавируһунан ыалдьыбыттар туруктара — этэҥҥэ. Дьокуускайга ыалдьыбыт дьахтар туруга орто ыарахан, быраастар хонтуруолларыгар сылдьар. Кинини ИВЛ-аппаратыгар холбообуттара, тэҥҥэ Москва быраастарын кытта телемедицина нөҥүө сибээстэһэллэр», — диэн Ил Дархан Айсен Николаев бүгүҥҥү брифинигэр иһитиннэрдэ.
«Ленскэй Чаяндинскайдааҕы гаастаах сирин тула олус элбэх ыйытыы киирэр. Элбэх ыалдьыбыт киһи баарынан сибээстээн, бу сиргэ ыарыы сыстар көрдүгэнэ баар быһыылаах. Ленскэй балыыһатыгар үс коронавирустаабыт киһи Чаяндинскайтан кэлэн эмтэнэ сылдьар, үс киһи анаалыһа «отрицательнай» диэн дьаҥ суоҕун көрдөрдө. Үлэ салҕанар. «Газпром» салалтатын кытта кэпсэтиилэр бараллар, баахтабай бөһүөлэккэ киирии-тахсыы сабыллыбыта.
Алдаҥҥа коронавирустаабыт дьону кытта хантаактаспыт дьон быһаарыллыбыттара, анаалыс ыла сылдьаллар. Билигин онно харанатыыны тутуһуохтарын наада.
Дьокуускай олохтоохторугар дьиэҕэ бэйэни хааччахтаан олоруу эрэсиимин тутуһалларыгар көрдөһүөм этэ. Манна соторутааҕыта булуллубут ыарыы балыыһаҕа эмтэниллибэтэх пневмония таһымыгар биллибитэ. Онон, улахан наадата суох буоллаххытына мээнэ уопсастыбаннай сирдэргэ сылдьымаҥ.
Эпидемия саҕаланыаҕыттан Саха сиригэр 36 киһи ыарыйда. Онтон 15-һэ үтүөрбүтэ.
Олус элбэх ыйытыы мэдиссиинискэй мааска тула киирэр. Кытайтан атыыласпыппыт, онно кыраныысса сабыллыбытыгар таможняҕа кыһалҕалары көрсө сырыттыбыт. Бүгүн эбиэт кэнниттэн үс мөлүйүөн мааска Дьокуускайга кэлиэҕэ. Бу маны коронавируһу утары үлэлиир уорганнарга, быраастарга тиэрдиэхпит. Иккис партия мааска эмиэ сотору кэлиэҕэ», — диэн Ил Дархан брифинг кэмигэр иһитиннэрдэ.
edersaas.ru
Хаартыска — интэриниэттэн.