Ахсынньы ый 9 күнүгэр Устин Нохсоороп аатынан Духуобунас киинигэр олус бэрт тэрээһин буолла.
Бу киин иһинэн уонча сыл үлэлээбит, СӨ үтүөлээх артыыһа Федот Потапов аатынан «Мааска» оҕо тыйаатырын устуудьуйата «Тоҥ хаарга сибэккилэр» испэктээги туруоран көрдөрдө.
edersaas.ru
Бу Абаҕа орто оскуолатын 9-11 кылааһын оҕолоро сэрии кэмигэр Ленинград театральнай институтугар үөрэнэ барбыт ыччаттар суорума суолламмыт дьылҕаларын, дьиҥ чахчы буолбут историяны сырдаттылар.
Испэктээги театральнай устуудьуйа режиссера Евгения Попова туруорда. Бу туруорууну сыаналыы уонна кыттыбыт оҕолору эҕэрдэлии Федот Федотович кэргэнэ Зоя Багынанова, кыргыттара Надежда уонна Елизавета Федотовналар ыалдьыттаатылар.
Испэктээк көрөөччү биһирэбилин ылла, оонньообут оҕолор бэйэлэрэ да астыннылар. Оччотооҕу 16-18 саастаах оҕолор ыар дьылҕаларын, олохторун тиһэх түгэннэрин бу баардыы ылыннарыылаахтык толороннор, үгүс көрөөччү уйадыйда. Бу туруорууну оҕолор салгыы Саха тыйаатырыгар киирэн көрдөрүөхтэрин баҕараллар.
Оҕо театральнай устуудьуйаларын үлэлэтии туһунан президеммит Владимир Путин уураах таһааран турар. Онно олоҕуран, Амматааҕы оҕо искусствотын киинэ бу Абаҕатааҕы “Мааска” театральнай устуудьуйаны филиал оҥорбута хайҕаллаах. Онон, быйылгыттан саҥа талыллыбыт 20 оҕо тыйаатыр эйгэтин, умсугутар кэрэтин билсэр кыахтанна.
Бу оскуоланы быйыл бүтэрэр, эдэр артыыс оҕолор тыйаатыртан кынаттанан үөрэх араас салааларыгар айанныахтара. Оҕо дьоҕурун, баҕатын салгыыр инниттэн, кини ханна да тиийдин, талаанын үөскэтэр, сайыннарар эйгэни үөскэтиэххэ…
Испэктээк Ленинград алдьархайыттан тыыннаах ордон кэлбит Е.К.Лепковская, И.В.Попов ахтыыларыттан туруоруллубут.
Таня Монастыреваны — Саша Белолюбская, Исай Попову — Илья Нектыров, Анастасия Ларионованы Маша Емельянова олус бэркэ оонньоотулар.
Үтүө салайааччы Евгения Попова бу оҕолору угуйан, тоҕус сыл тыйаатырга дьарыктаан, төрөппүттэргэ сүҥкэн көмөнү оҥордо. Ону оҕолор туоһулаатылар, төрөппүттэр махтаннылар.
Оҕо тыйаатыра ыччаты иитиэ, умсугутуо. Оҕо тыйаатырын Саха сиригэр сайыннарыаҕыҥ, өйүөҕүҥ!
Акулина ИВАНОВА-АЙГЫЫНА, “Саха сирэ” хаһыат, edersaas.ru сайтка анаан.