Мааска тигиитин куонкуруһугар кыайыылаахтары быһаардылар

Ааптар: 
Бөлөххө киир:

СӨ Үүнэр көлүөнэтин пуондата Оҕо көмүскэлин күнүгэр аналлаах харыстанар маасканы оҥорууга куонкурус кыайыылаахтарын уонна призердарын аатын иһитиннэрдэ.

edersaas.ru

Ол курдук, 6-12 саастаах оҕолорго кыайыылааҕынан Дьокуускай куорат 9-с нүөмэрдээх оскуолатын 1 кылааһын үөрэнээччитэ Рома Левух буолла. Онтон 12-16 саастаах оҕолор ортолоругар кыайыылааҕынан Өрөспүүбүлүкэтээҕи саҥаларыгар кэһиллиилээх оҕолор анал (коррекционнай) интэринээт-оскуолаларын 8-с кылааһын үөрэнээччитэ Алина Соколова ааттанна.

“Көрөөччү биһирэбилэ” номинацияны 6-12 саастаах оҕолорго Өрөспүүбүлүкэтээҕи саҥаларыгар кэһиллиилээх оҕолор анал (коррекционнай) интэринээт-оскуолаларын үөрэнээччитэ Алина Акимова, 13-16-гар диэри саастаахтарга Мэҥэ Хаҥалас улууһун Р.А. Бурнашев аатынан Табаҕа оскуолатын 8-с кылааһын үөрэнээччитэ Стас Аманатов ыллылар.

Эбии олохтоммут “Креативнай презентация” номинацияҕа Дьокуускай куорат Д.Г. Новопашин аатынан 10-с нүөмэрдээх оскуола 8-с “В” кылааһын үөрэнээччитэ Эльмира Скрябина бирииһи тутта.

Куонкурус усулуобуйатын быһыытынан кыттааччылар харыстанар мааскалары тиктэн, оҥостон бэйэлэрин инстаграмҥа аккауннарыгар таһаарыахтаахтар. Үлэлэри Ирина Сарта салайааччылаах «SARTA» иис оскуолатын дьүүллүүр сүбэтэ сыаналаата.

Киирбит үлэлэр быыччыктарыттан, уустуктарыттан, тупсаҕайдарыттан уонна уратыларыттан сөхтүбүт.  Кыттааччылар аҕыйаҕа суох бириэмэни ыыппыттара көстөр. Онон педагог быһыытынан мантан улаханнык үөрдүм”, — диэн Ирина Сарта бэлиэтиир.

Үүнэр көлүөнэ пуондата оскуола үөрэнээччилэригэр анаан бырааһынньык күн араас интэриэһинэй уонна туһалаах тэрээһиннэри ыытар. Ааспыт сылларга “ГудФест” маассабай бэстибээл ыытыллыбыта: Дьокуускайга уонна улуустарынан лиэксийэлэр, маастар-кылаастар, куонкурустар буолбуттара. Былырыыҥҥыттан эпидемияны утары миэрэлэри учуоттаан, тэрээһиннэр интерактивнай көрүҥүнэн бараллар.

Бүгүн оҕолору туһалаах дьарыкка сыһыарар уонна дьаҥы утары быраабылаларга үөрэтэр суолталаах. Биһиэхэ 29 интэриэһинэй, илиинэн оҥоһук киирдэ, оҕолор олус эппиэтинэстээхтик ылынан оҥорбуттар, айар кыахтарын, маастарыстыбаларын барытын туһаммыттар. Онон куонкурус туһалаах эрэ буолбакка, оҕолорго бэйэлэригэр уонна төрөппүттэргэ интэриэһинэй буолла. Бары кыайыылаахтары уонна кыттааччылары эҕэрдэлиибин, кытаанах доруобуйаны, интэриэһинэй сынньалаҥы баҕарабын”, — диэн СӨ Үүнэр көлүөнэтин пуондатын генеральнай дириэктэрин бастакы солбуйааччы Наталья Оленева  санаатын тиэртэ.

Ону тэҥэ, Оҕо көмүскэлин күнүгэр “Комбинация” саахымат кулуубун кытта пуонда оскуола үөрэнээччилэригэр саахымакка онлайн турниры ыытар. Күрэхтэһии Lichess.org саайтка онлайн көрүҥүнэн барар.

СӨ Үүнэр көлүөнэтин пуондатын пресс-сулууспата.

+1
0
+1
0
+1
0
+1
0
+1
0
+1
0
+1
0