Аптекаҕа мааска тиийбэккэ билигин сатаан иистэнэр киһи барыта мааска тигэр. Бириэмэлээх уонна кыахтаах дьон биирдии маасканы биирдии мөһөөккө атыылаан, эбии дохуот оҥостор. Аны ол атыыласпыт өрбөҕүҥ эрэһиинэтэ тарда сылдьар, киһи кыайан өр кэппэт, устан быраҕан кэбиһиэххин баҕараҕын. Саҥаттан саҥаны атыылаһар ночооттоох.
Үгүс дьон мааска наһаа сыаналаах, тоҕо ону хонтуруоллаабаттарый диэн сонньуйар. СӨ Сыана бэлиитикэтин судаарыстыбаннай кэмитиэтин бэрэссэдээтэлэ Антонина Винокурова этэринэн, федеральнай сокуон быһыытынан, аптекаҕа атыыланар ГОСТ ирдэбилигэр эппиэттиир эрэ мэдиссиинискэй мааска сыанатыгар атыы-эргиэн эбилигин биэдэмистибэ хонтуруоллуур кыахтаах.
«Урбаанньыттар уонна кэтэх тэрилтэлэр тикпит мааскалара сертифицированнай мэдиссиинискэй тэрил буолбатах, ол иһин, сыанатын оҥорон таһаарааччы бэйэтэ быһаарар», — диэн этэр кини.
Онон дьон наадыйарын тухары мааска сыаната түһэрэ саарбах.
Марианна Тыртыкова, «Саха сирэ», edersaas.ru
Хаартыска rweek.ru