Бу күннэргэ Ньурба улууһун Маалыкай нэһилиэгин дьаһалтатыгар саҥа уопсай дьиэ түөрт кыбартыыраларын символическай күлүүстэрин туттардылар.
edersaas.ru
Нэһилиэк пресс-киинэ иһитиннэрбитинэн, Маалыкайга үлэлии кэлбит исписэлиистэргэ анаан эрдэ тутуллубут уопсай дьиэ уокка былдьаммыта. Ону быйыл саҥаттан туттаран, силигин ситэрэн олохсуйарга санаммыт дьоҥҥо сэрэбиэй быһыытынан кыбартыыралары тыырдылар.
«Энергосбыт» уонна улуустааҕы ОДьКХ филиалын кытта дуогабардарга илии баттаннаҕына, бу дьиэҕэ социальнай наймылаһыы бэрээдэгинэн педиатр, стоматолог, учууталлар уонна учаастактааҕы полиция үлэһитин дьиэ кэргэннэрэ киириэхтэрэ.
Бордоҥ нэһилиэгин баһылыга Леонид Ушканов саҥа дьиэҕэ киирээри сылдьар дьону эҕэрдэлээн баран, үлэ хаамыытын, толору хааччыллыылаах дьиэ ис-тас оҥоһугун, социальнай наймылаһыы араас өрүттэрин сырдатта. Инникитин даҕаны кэлии дьон олохторун тупсарар бу курдук быһаарыылар Маалыкайга араас идэлээх исписэлиистэр олохсуйа кэлэллэригэр төһүү күүһүнэн буолуо диэн эрэлин биллэрдэ.
Сэрэбиэй кэнниттэн Леонид Ушканов олохсуйуохтаах дьону уопсай дьиэҕэ илдьэн кыбартыыраларын көрдөрдө, араас чопчулуур ыйытыктарга хоруйдаата.
Елена ПОТОЦКАЯ, «Саха сирэ» хаһыат, edersaas.ru
Хаартыска — Маалыкай нэһилиэгин дьаһалтатын инстаграмыттан.