Ньурба улууһун М.В. Мегежекскэй аатынан Маалыкайдааҕы агрооскуолаҕа быйыл иккис сылын үөрэнээччилэр бизнес-бырайыактарын уонна идиэйэлэрин куонкурустара ыытылынна.
edersaas.ru
Куонкурус сүрүн соруга — аныгы тэтимнээх үйэҕэ оҕону оскуола боруогуттан бэйэ дьыалатын тэриниигэ үөрэтии, дьиэ кэргэн дохуотун хаҥатарга көхтөөх буолууну көҕүлээһин. 2 кылаастан 8 кылааска диэри үөрэнээччилэр 26 бырайыагы көмүскээтилэр. Кэрэхсэбиллээҕэ, быйылгы куонкуруска бэрт элбэх уол кытынна.
— Бырайыктар араас хайысхалаах ис хоһоонноохтор. Холобур, Алексей Егоров (8 кылаас) сир аһын хомуйан атыылаан, харчы мунньунар эбит.
Оттон Василий Петров (5 кылаас) туос уллуҥах онорон атыылыыр былааннаах. Бу маннык туос атах таҥаһа вирус, бактерия араас көрүҥүн өлөрөрүн, онон киһи доруобуйатыгар туһалааҕын бэлиэтиир. Кондитерскай оҥоһук арааһын төрөппүттэрин кытта оҥорон, Дамир Кононов (3 кылаас) уонна Миша Саввинов (5 кылаас ) араас кыраһыабай туортары, пирожнайдары астаан аҕалан сөхтөрдүлэр. Оттон Егор Егоров убайдарын кытта суши-роллы оҥорон, нэһилиэк олохтоохторун хас бырааһынньык аайы күндүлүүллэрин туһунан үөрэ кэпсээтэ.
Доруобуйа киһи олоҕор сүҥкэн оруоллааҕын бэлиэтээн туран, 7-с кылаас үөрэнээччилэрэ Алексей Стручков уонна Николай Николаев кучу оту хомуйалларын кэпсээтилэр.
Уолаттар бу бизнеһи үчүгэйдик үөрэтэн баран, саха чэйин пропагандалыыр санаалаахтар. Оттон Арсений Иванов уонна Вадим Потапов «Марвел» диэн ааттаан саататар култуурунай киини аһыахтарын баҕараллар эбит. Манна сүрүннээн анимация көрүҥүн сайыннарар баҕалаахтар. Семен Яковлев «Оскуолаҕа киириэн иннинээҕи оҕо киинэ» диэн эмиэ олус интэриэһинэй бырайыагы билиһиннэрэн соһутта.
5 кылаас уолаттара Кеша Татаринов уонна Николай Андреев талах сиппиир оҥорон аҕалан көрдөрө-көрдөрө кэпсээтилэр.
Онон сотору кэминэн уолаттар талах сиппиирдэринэн нэһилиэк ыалларын тиэргэннэрин толорор былааннаахтар. Саша Иванов, Роберт Чемпосов, Рустам Сергеев «Оскуола киинэ көрөр саалата» бырайыактарынан былырыыҥҥы бизнес-бырайыактары көмүскээһиҥҥэ билиһиннэрбиттэрэ. Бу бырайыактарын былырыын бэркэ үлэлэппиттэрэ. Уолаттар быйыл саалаларын саҥа тэрилинэн тупсарар соруктаахтар. Өссө биир олус интэриэһинэй бизнес-бырайыагы 9 кылаас үөрэнээччилэрэ Арчын Саввинов, Сахастал Григорьев билиһиннэрдилэр. Уолаттар «Сапропель — күөл баайа» диэн күөл үүнээйитин үүннэриигэ удобрение оҥорор соруктаахтар.
Кыргыттар бырайыактара эмиэ интэриэһинэй. Аныгылыы шеллак диэн тыҥырах оноруутуттан саҕалаан, фоамиранынан баттах киэргэлэ, фейс-арт, фантик, хаартыскаҕа түһэрии курдук араас бизнес-бырайыактары кэпсээтилэр. Олортон саамай ураты уонна уустук оҥоһуктары оҥорор бизнес-бырайыактаах икки кыыс үлэтин бэлиэтиэххэ сөп. Бэһис кылаас үөрэнээччилэрэ Айыллаана Попова уонна Алексина Кузьмина ийэлэрин кытта бииргэ дьарыктаналлар эбит. Холобур, Айыллаана ийэтин кытта араас сувенирдары мунньалларын уонна оҥороллорун сөбүлүүллэр эбит. Пластиктан, фетртан оҥорбут араас магниткалара олус кыраһыабайдар. Олох хотуобай оҥоһуктар курдуктар. Оттон Алексина Кузьмина ийэтин кытта тайах муоһуттан киэргэл арааһын чочуйан оҥорор эбит.
Киэргэллэрэ харысхал бэлиэлээхтэр, суруктаахтар. Браслет, ытарҕа, моойго кэтэр араас оҥоһук дэлэй. Ити курдук биһиги оскуолабыт оҕолоро талааннарын, сатабылларын, дьулуурдарын, тулуурдарын бизнес-бырайыактарга анаан арыйан билиһиннэрдилэр. Онон бу тэрээһин оҕону оскуола сааһыттан саҕалаан, дьоҕус бизнес араас көрүҥүн баһылыырга үөрэтии олус сөптөөҕүн толору дакаастаата, — диэн кэпсиир национальнай култуура учуутала, оскуола пресс-киинин салайааччыта Прасковья Яковлева.
Ити курдук, оҕолор бизнес-бырайыактары көмүскээн баран, аны бэйэ дьыалатын тэринэн, бу бырайыактарын олоххо киллэрэн барыахтара. Онон Маалыкай агрооскуолата Бизнес-инкубатор тэринэрэ уолдьаспыт.
Елена ПОТОЦКАЯ, «Саха сирэ», edersaas.ru
Хаартыскаҕа Прасковья Яковлева түһэриитэ.