Маалыкай орто оскуолатыгар үлэлиир прес-киин быйылгы үөрэх дьылыгар бэрт сонун сүүрээни олоххо киллэрдэ.
edersaas.ru
– Аныгы үйэ тэтиминэн оҕо билиитин-көрүүтүн сайыннарар көрүҥ бэрт элбэх. Ол эрээри күннээҕи сонуну тута, “сойуппакка” тиэрдии – кэм ирдэбилэ. Ол оннук сонун сүүрээни бу күннэргэ оскуола иһинэн үлэлиир пресс-киин саҕалаата. Дириэктэри үөрэх чааһыгар солбуйааччы Марфа Спиридонова көҕүлээһининэн, Саратов куораттан араадьыйа тэрилин анаан сакаастаан туруордулар.
Араадьыйанан иһитиннэрии – үөрэнээччилэргэ олус туһалаах көрүҥ. Ол курдук, кылгас сынньалаҥ кэмигэр оҕолор оскуола олоҕун сырдатар сонуннары истиэхтэрэ, биллэриилэргэ болҕомтолорун туһаайыахтара. Пресс-киин айар дьоҕурдаах 20 эдэр кэрэспэндьиэнэ араас интэриэһинэй биэриилэри үс тылынан: нууччалыы, английскайдыы уонна сахалыы бэлэмнээн ыыталлар. Бастакы биэриилэр: оскуола сонуннара, ийэлэри эҕэрдэлээһиннэр үс тылынан бэлэмнэнэн эфиргэ барбыттарын оскуола оҕолоро да, учууталлар да олус сэргээтилэр, – диэн кэпсиир оскуола пресс-киинин салайааччыта, история, обществознание уонна национальнай култуура предметтэрин үөрэтэр учуутал Прасковья Яковлева.
Эдэр кэрэспэндьиэннэр Алексей Стручков уонна Денис Кузьмин бастакы биэриилэрин, тугу барытын умнан олорон, английскай тылынан биэрэ олороллорун учууталлара хаартыскаҕа түһэрэн ыытта.
Ньурба Маалыкайын орто оскуолатын сонун бырайыагы олоххо киллэриитин үгүс оскуолаҕа болҕомтоҕо ылыахтара диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Хаартыска: Прасковья Яковлева түһэриитэ.