Бэлиитикэ Маны аах

Маалтааны нэһилиэгин баһылыга Дмитрий Борисов: ардаҕы туһанан күүскэ үлэлиэхпитин наада

Горнай улууһун Маалтааны нэһилиэгэр билигин икки сиринэн улахан ойуур баһаара бара турар. Нэһилиэк баһылыга Дмитрий Борисов этэринэн, ардах түспүт кэмин туһанан билигин баһаары умуруорууга үлэ күүскэ барар.

Маалтааны – Горнай улууһун саамай түгэх нэһилиэгэ. Улуус кииниттэн 18 көс ыраах сытар. Иллэрээ күҥҥэ диэри олохтоох нэһилиэнньэ бэйэтэ, ону таһынан “Авиалесоохрана” тэрилтэ Горнайдааҕы отделениетыттан, Ыксаллаах быһыы-майгы министиэристибэтиттэн анал бөлөх үлэлии сылдьыбыт буоллаҕына, иллэрээ күнтэн саҕалаан Дьокуускайтан бэйэ баҕатынан ОДьКХ, Тыа хаһаайыстыбатын министиэристибэтиттэн, “Водоконал” тэрилтэттэн дьон кэлэн көмөлөһө сылдьаллар.

“Нэһилиэкпитигэр үс улахан баһаар баарыттан билигин икки баһаар холбоспута. Ону таһынан кыра уоттар бааллар. Күн бүгүн биһиэхэ ЫББМ – 11 киһи, Бэрдьигэстээхтэн “Авиалесоохрана” тэрилтэттэн – 14 үлэһит баһаарга сылдьаллар, ону таһынан бу күннэргэ ОДьКХ, Тыа хаһаайыстыбатын министиэристибэтиттэн, “Водоканал” тэрилтэттэн кэлэн баҕа өттүлэринэн көмөлөстүлэр. Бу иннинэ улуус дьаһалтатыттан Тыа хаһаайыстыбатын управлениетын үлэһиттэрэ кэлэн үлэлэспиттэрэ. Тиэхиньикэ туһунан этэр буоллахха, бу күннэргэ Маҕараска үлэлээбит “ДТ” тыраахтар кэлбитэ. Ону таһынан ЫББМ икки массыыната үлэлии сылдьар. Манна даҕатан эттэххэ, улуус кииниттэн ыраах сытар буоламмыт уонна суолбут-ииспит да суоҕунан, тиэхиньикэ да, киһи да кэлиитэ уустук. Онон күүс-көмө буола сылдьар дьоммутугар, Ил Дархаммытыгар Айсен Николаевка, ону сэргэ үбүнэн-харчынан, аһынан-үөлүнэн, туттар тэрилинэн, тиэхиньикэ оттугунан хааччыйбыт улууспут дьаһалтатыгар, Нэһилиэнньэҕэ куттал суох буолуутун хааччыйар судаарыстыбаннай кэмитиэккэ, биир дойдулаахтарбытыгар, өрөспүүбүлүкэ уопсастыбаннаһыгар нэһилиэк дьонун аатыттан махталбытын тиэрдэбит”, – диэн этэр нэһилиэк баһылыга Дмитрий Борисов.

Санатан эттэххэ, бэҕэһээ Ил Дархан Айсен Николаев Күөрэлээххэ кэлэ сылдьан быһыыны-майгыны билсэн барбыта. Ону сэргэ иллэрээ күн Кэптиҥҥэ бэйэтигэр Нэһилиэнньэҕэ куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы, Горнай улууһугар ойуур баһаарыгар эппиэттээх Иннокентий Андросов кэлэн дьону-сэргэни кытары көрсүбүтэ. Олохтоох дьон окко киирбиттэринэн сибээстээн, баһаарга үлэһит илии уонна ойуурга сылдьар тыраахтар тиийбэтинэн, көмө наада этэ.

“Нэһилиэнньэ ойуур баһаара туруоҕуттан күн аайы тахсан үлэлиир. Биир улахан баһаарбыт бөһүөлэкпитигэр чугаһыыр кутталланан, ыксаллаах быһыы-майгы биллэрэ сылдьыбыппыт. Онно тута сөрөөн нэһилиэк эр дьоно бары тахсыбыттара. Бириэмэтигэр түргэнник хамсанан, бөһүөлэккэ чугаһыыр кутталын туораппыппыт. Бу диэки ардах бөлүүн икки чаастан саҕалаан чаастан ордук түспүтэ. Билигин ардах суох. Онон ардах түспүтүн туһанан баһаары умуруорарга сүрүн күүспүтүн уура сылдьабыт”, – диэн бэлиэтиир баһылык Дмитрий Дмитриевич.

Аграфена КУЗЬМИНА, “Саха сирэ” хаһыат, ааптар хаартыскаҕа түһэриитэ.

0
0