Бүгүн Сунтаар улууһун Бүлүүчээн нэһилиэгин батсаап-бөлөхтөрүнэн маннык ис хоһоонноох иһитиннэрии тарҕанна: «Күндү биир дойлулаахтарым! Бу сарсыарда калиткабар Маай бырааһынньыгынан эҕэрдэлээн, Эйэ холууптаах, икки шаригы булан, үөрүү өрөгөйө миэхэ буолла. Эҕэрдэлээбит дьоннорго улахан да, улахан махталбын тиэрдэбин!!! Эһигини барыгытын Маай бырааһынньыгынан итиитиик-истиҥник эҕэрдэлиибин, Дьоллоох буолуҥ!!!».
edersaas.ru
Онон, Маайдааҕы соһуччу бэлэҕи тутан, дьон ким уурбута буолуой диэн таайыы бөҕө буолбуттар. Бүлүүчээн олохтооҕуттан ыйыталаһан билбиппит, улахан дьиэ кэргэн тапталлаах ийэлэрэ, эбээлэрэ, уопсастыбанньык Лидия Иннокентьевна Тимофеева түөлбэ ыалларыгар анаан оҥорбут эбит.
Лидия Иннокентьевнаны кытары сибээстэһэ сылдьыбыппытыгар:
— Дьоҥҥо кыра да үөрүү наада диэн оҕолорбор Надяҕа, Ньургустаанаҕа, Ираҕа, сиэн кыыспар Каринаҕа, балтыбар Туйаараҕа идеябын кэпсээбиппэр, тута сөбүлэспиттэрэ. Балтым маҕаһыынтан саар, өҥнөөх кумааҕы ылан аҕалбыта. Онон киэһээ биһиэхэ мустан сибэкки оҥорбуппут, кыра балтыбыт Василина холууп ойуулаан, ону өҥнөөх кумааҕыга килиэйдээбиппит. Уонна түөлбэм ыалларыгар калиткаларыгар уурбуппут, дьон сарсыарда көрөн санаалара көтөҕүллүө — диэн кэпсээтэ.
Лидия Иннокентьевна оҕолорун,балтын уонна сиэнин кытта саардарын түүн ыйаабыттар. Соһуччу бэлэҕи туппут дьон, билиҥҥи ыарахан кэмҥэ санаалара көтөҕүллүө диэн бүк эрэллээхпит.
Билигин дойду үрдүнэн дьиэҕэ олоруу эрэсиимэ биллэриллэн, бүгүн Маай бырааһынньыгын хаһааҥҥытааҕар да уратытык ылабыт. Социальнай ситимнэринэн онлайн-тэрээһиннэр, кэнсиэртэр ыытыллаллар.
edersaas.ru