Арассыыйаҕа сөмөлүөтүнэн тиэйии төһө эмэ аччаабытын үрдүнэн, ыам ыйын бырааһынньыктарыгар Арассыыйа 70 тыһыынча олохтооҕо атын эрэгийиэннэргэ сөмөлүөтүнэн уонна буойаһынан айаннаан барыаҕа. Кинилэртэн сорохторо дьиэлэригэр төннөллөр диэн Коммерсантъ саайт иһитиннэрэр.
edersaas.ru
Арассыыйаҕа коронавирус тарҕаныытын киининэн ааҕыллар Москваттан, Москва уобалаһыттан уонна Санкт Петербургтан кэлбит дьон уобаластарга икки нэдиэлэлээх булгуччулаах харантыыҥҥа олоруохтаахтар.
Ханна көтөллөрүй?
Билиэттэри атыылыыр Aviasales агрегаторын сыанабылынан, Москваттан уонна Санкт Петербуртан ыам ыйын бырааһынньыктарыгар (муус устар 29 күнүттэн ыам ыйын 12 күнүгэр диэри) 70 тыһыынча кэриҥэ пассажир көтүөҕэ.
Кинилэр айанныыр хайысхалара – Махачкала, Минеральные Воды, Симферополь, Владикавказ, Краснодар, Сочи, Казань, Ростов-на-Дону.
Оттон Tutu.ru саайт чахчытынан, дьон саамай Калининградка, Магадаҥҥа уонна Анапаҕа барыыга наадыйар.
Ол эрээри бу дьон төттөрү төннөр билиэт ылбатахтарынан сабаҕалаатахха, кинилэр дьиэлэригэр төннөллөр.
Буойаһынан Москваттан Казаҥҥа, Ивановоҕа, Сочига, Воронежка, Волгоградка, Владимирга айанныыллар эбит.
Женни СТРЮКОВА,
“Саха сирэ” хаһыат, edersaas.ru
Хаартыска: интэриниэттэн.