Маҥнайгы кылааска киириигэ сайабылыанньаны муус устар 1 күнүттэн туталлар
“Дьокуускай куорат” куораттааҕы уокурукка баар 53 муниципальнай оскуолатыттан, 50 оскуола маҥнайгы кылааска сурутууну ыытар. Дьокуускай куорат лиссиэйэ, В.П. Ларионов аатынан физика-тиэхиньиическэй лиссиэй 5-с кылаастан, Үөрэх киинэ (“Центр образования”) 9-с кылаастан оҕолору ылар.
РФ Үөрэҕириигэ министиэристибэтэ 2020 сыллааҕы оскуолаҕа ылыы бирикээһигэр олоҕуран, Дьокуускай куоракка маҥнайгы кылааска киирэр оҕолор төрөппүттэриттэн сайабылыанньаны 2022 сыл муус устар 1 күнүттэн саҕалаан тутуохтара диэн куорат үөрэҕин управлениетын саайтыгар суруйаллар. Үөрэххэ ылыы икки түһүмэҕинэн барар:
I түһүмэх — 2022 сыл муус устар 1 күнүттэн бэс ыйын 30 күнүгэр диэри. Манна уочаракка турбат (внеочередное), бастакы уочарат (первоочередное) эбэтэр олорор аадырыстарынан хапсар оскуолаларыгар биэрэллэр.
II түһүмэх – от ыйын 6 күнүттэн миэстэ туолуор диэри, ол эрээри 2022 сыл балаҕан ыйын 5 күнүн хойутаппакка. Манна олорор дьиэттэн атын аадырыска баар оскуолаҕа биэриэххэ сөп. Өскөтүн бастакы түһүмэххэ олорор дьиэҕититтэн атын аадырыска баар оскуолаҕа сайабылыанньа ыыттаххытына, аккаастыахтара диэн сэрэтэллэр.
Оҕону оскуолаҕа ылалларын туһунан бирикээһи, оскуола бастакы түһүмэх кэнниттэн сайабылыанньаны тутуу түмүктэммитэ 3 үлэ күнүн иһинэн таһаарар. Иккис түһүмэххэ докумуону тутан баран 5 үлэ күнүн иһинэн таһаарар.
Дьокуускай куорат үөрэҕин управлениетын начаалынньыга Алексей Семенов: “Бастакы кылааска 2022-2023 үөрэх дьылыгар куоракка баар уһуйааннартан 5 441 оҕо киирэрэ былааннанар. Итинтэн 287 оҕо – чааһынай уһуйааннартан. Ис, тас миграцияны кытта холбоон 5900 оҕо маҥнайгы кылааска киириэ диэн суоттанабыт”, — диэн иһитиннэрдэ.
Олорор аадырыскытынан ханнык оскуолаҕа, уһуйааҥҥа хапсаргытын көмпүүтэртэн киирэн 2ГИС каартатын саайтыгар көрүөххүтүн сөп. Мобильнай сыһыарыыга 2022 сыл муус устарыттан киллэриэхтэрэ диэн иһитиннэрэллэр.
Сиһилии ыйыллыбыт сигэнэн киирэн http://yaguo.ru/node/11067 Дьокуускай куорат үөрэҕин управлениетын саайтыгар ааҕыҥ.
Людмила ПОПОВА, “Саха сирэ” хаһыат, edersaas.ru
Хаартыска: СИАтан.