Быйыл бэс ыйын 3 күнүттэн аналоговай биэрии тохтоон, цифровойга көспүтэ. СӨ инновацияҕа, цифровой сайдыыга уонна инфокоммуникационнай технологияларга миниистирэ Анатолий Семенов иһитиннэрбитинэн, өрөспүүбүлүкэ үрдүнэн 500-тэн тахса волонтер нэһилиэнньэни тэлэбиисэринэн биэрии сигналыгар холбоон, сүбэлээн-амалаан биэрбит. Быһа сибээскэ 4 тыһыынчаттан тахса сайаапка киирбит.
edersaas.ru
Туһааннаах боппуруос бастакы түмүгүн, кыһалҕаларын бүгүн буолбут СӨ Бырабыыталыстыбатын мунньаҕар көрдүлэр. Цифровой биэриигэ көһүүгэ анаан өрөспүүбүлүкэ бүддьүөтүттэн 34 мөл. 653 тыһ. солкуобай көрүллүбүт. Цифровой тэлэбиидэнньэ хаппат сиригэр олорор нэһилиэнньэлээх пуун кыра дохуоттаах олохтоохторо ытыс соттон хаалбаттарын туһугар, спутниковай тэлэбиидэнньэ тэрилин ылынар, тиэрдэр, холбонор ороскуоттарын уйунарга анаан компенсация көрүллэр. Кэмпилиэк быһа холоон 10-11 тыһ. солк. тэҥнэһэр. Бырабыыталыстыба бэрэссэдээтэлэ Владимир Солодов: “Өрөспүүбүлүкэ уонна туһааннаах уорганнар соруктара – кыра дохуоттаах уонна анал категорияҕа хапсар дьоҥҥо спутниковай сигнал тэрилин ылалларын хааччыйыы. Үп көрүллүбүтэ эрээри, дьон түргэнник туһаммат. Ол иһин компенсацияны атыылаһыахтарын иннинэ көрүөхпүт”, — диэн быһаарда. Бу иннинэ харчыта дьон бэйэтэ атыыласпытын кэннэ төннөрүллэрэ. Билигин олохтоохтор дуогабардаһан баран, тэриллэрэ кэлбитин кэннэ төлүүр буолуохтара.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.