Горнай улууһун Одуну нэһилиэгэр, дойдуга коронавирус эпидемиятынан, дьон самоизоляцияҕа олорбута эмиэ иккис нэдиэлэтэ буолла.
Мин бүгүн Маҕарас олохтооҕо, “Айтал” түөлбэ (ТОС) салайааччыта Жоржетта Ивановна Текеяновалыын төлөпүөнүнэн кэпсэттим:
—Биһиги дьиэбитигэр иккис нэдиэлэбитин олоробут.
Оскуола оҕолоругар бу нэдиэлэттэн тэйиччиттэн олорон үөрэхтэрэ саҕаланна. Бу иннинэ эксээмэн туттарар оҕолорго анаан эмиэ дистанционнай консультация биэрбиттэрэ.
Нэһилиэкпитигэр волонтердар үлэлииллэр – кырдьаҕастарга бородуукталарын, эмтэрин, хаһыаттарын дьиэлэригэр илдьэн биэрэллэр. Дьоннор, олус наада буоллаҕына маҕаһыыҥҥа сылдьалларыгар, мааска кэтэллэр. Тэрилтэлэр, биирдиилээн дьон спонсордаан, аҕам саастаахтарга, элбэх оҕолоохторго мааска тигэн биэрэллэр.
Нэһилиэкпит дьоно олорон хаалбакка, дьиэ ис -тас үлэтигэр сылдьар. Хаар быйыл элбэх буолан, олбуордарыттан таһаллар, кырыыһаттан түһэрэллэр, мас хайыталлар, сибиэһэй салгыҥҥа биирдиилээн хаамаллар, доруобуйаларын бөҕөргөтүнэллэр. Коронавирус туһунан информацияны тэлэбииһэринэн, араадьыйанан, хаһыатынан уонна ватсап нөҥүө ааҕа, истэ-билэ олоробут. Бибилэтиэкэлэр, кулууптар ватсабынан араас күрэхтэһиилэри, викториналары ыыталлар. Мин үс викторинаҕа кыттан миэстэлэстим, сиэним хоһоон күөн күрэһигэр кыттан номинация ылла.
Биһиги «Айтал» ТОС бу күннэргэ Бэрэсидьиэн граннарын пуондатыгар бырайыак суруйан ыыттыбыт, — диир Жоржетта Ивановна.
Ити курдук, маҕарастар таах олорботтор, үлэлэрэ, интэриэһинэй дьарыктара үгүс.
Татьяна МАРКОВА.