Ааспыт өрөбүлгэ тыа хаһаайыстыбатын миниистирэ Александр Атласов Горнай улууһун Маҕараһыгар саҥа тутуллубут астыыр сыах аһыллыытыгар сырытта. Симиэнэҕэ биир туонна аҥаара үүтү астыыр кыамталаах сыаҕы “Горнай-Ас” тыа хаһаайыстыбатын потребительскэй кэпэрэтиибэ базаны хаҥатыы куонкуруһугар хотон ылбыт гранын (10 мөл. 143 тыһ. солк.) харчытынан тутан үлэҕэ киллэрдэ. Саҥа сыах үүт ас арааһын астыаҕа: пастеризацияламмыт үүтү, сүөгэйи, чөчөгөйү, суораты, иэдьэгэйи итиэннэ арыыны.
Даҕатан эттэххэ, “Горнай-Ас” кэпэрэтииби 2016 сыл күһүнүгэр улуус үс потребительскэй кэпэрэтиибэ уонна 45 бааһынай хаһаайыстыбата биир кэлим кииннэммит соҕотуопкалыыр тэрилтэ быһыытынан тэрийбиттэрэ. Ааһан эрэр 2018 сыл уон биир ыйын түмүгүнэн, кэпэрэтиип 3 тыһ. 353 туонна үүтү тутан астаабыт, ол иһигэр Маҕарастааҕы сыах кэлэктиибэ 89 туонна үүтү соҕотуопкалаабыт. Билигин саҥа дьиэлэнэн итиэннэ аныгы технологиянан хааччыллан, асчыттар үлэлэрин көрдөрүүтэ өссө тупсарыгар саарбахтаммат.
Александр Атласов салгыы саха ынаҕын иитиигэ идэтийэр «Сахаагроплем» СБТ салаатыгар, “АгроГорнай” ХЭУо сүөһү иитэр комплексыгар итиэннэ иллэрээ сыл ылбыт гранынан сылгы базатын туттубут, 160 сылгылаах Степан Контоев хаһаайыстыбатыгар сылдьан күннээҕи үлэни-хамнаһы, кыстык хайдах баран иһэрин билистэ.
Анна Сергучева, «Саха сирэ» хаһыат, edersaas.ru.