Маҕаҥҥа «Ритм» култуура киинигэр коворкинг-хос арылынна.
Дьокуускайга норуот айымньытын уокуруктааҕы киинин дириэктэрин солбуйааччы Ньургуйаана Ушницкая култуура тэрилтэлэригэр креативнай эйгэни тэрийии, нэһилиэнньэ айар-тутар дьоҕурун сайыннарарыгар, сынньалаҥы тэрийиигэ кыаҕы биэрэрин, болҕомтону тардарын, дьон-сэргэ кэрэхсиирин бэлиэтээтэ. Бу туһунан Дьокуускай куорат дьаһалтатын пресс-сулууспата СИА иһитиннэрэр.
«Уокуруктааҕы кииммитигэр, биһиэхэ, 16 филиаллаахпыт. Бу куорат таһынааҕы култуура дьиэлэрэ. Маныаха Дьокуускайга култуура-сынньалаҥ тэрилтэлэрин үлэлэригэр саҥардан, сибиэһэй, сонун, ураты сүүрээни киллэрэн биэрэллэригэр анаан «Креативная перезагрузка: модернизация деятельности культурно-досуговых учреждений г. Якутска» диэн бырагыраама оҥоһуллубута. Бу бырагыраама иитинэн хас биирдии филиал бэйэтин бырайыагын билиһиннэрэр. 2032 сылга диэри бары филиалларга сэлиэнньэ олохтоохторугар анаан маннык креативнай эйгэлэр тэриллиэхтэрэ», — диир кини.
Маныаха нэһилиэнньэ ыйытыыта көрүллэрин, баҕата учуоттанарын бэлиэтиир.
«Маны таһынан биһиги «Союз-16» барыйактаахпыт. Бу бырайыагынан култуура тэрилтэлэригэр аудио-визуальнай устуудьуйалар тэриллэллэр. Ол эбэтэр, бу тэрилтэлэр үлэни-хамнаһы социальнай ситиминэн көрдөрөр, билиһиннэрэр, сырдатар эрэ буолбакка, өссө тэрээһиннэрин архыыптыахтарын, харайан уурунуохтарын сөп. Итинэн биһиги сыаналаммат бэртээхэй пуондаланыахпыт. Устуудьуйалар маны сэргэ, издательскай үлэнэн дьарыктаныахтара», — диэн эбэн биэрэр.
«Ритм» КК дириэктэрэ Татьяна Тарасенко кэпсээбитинэн, креативнай эйгэни тэрийэр хостор наадалаах тэрилинэн хааччыллыбыттар, оҕолорго, ыччаттарга остуол оонньуулара баар буолбуттар.
«Манна кэлбит киһи бэйэтин баҕатынан сынньанарыгар, сөбүлүүр дьарыгынан дьарыктанарыгар, оонньуурга даҕаны миэстэни булар. Хостор элбэх хайысханы толороллор. Холобур, биир хоско иистэниэхэ, уруһуйдуохха, онтон да атын айар үлэнэн дьарыктаныахха сөп. Бу оҕолор, ыччаттар үүнэн-сайдан тахсалларыгар ордук үчүгэй, тирэх буолуоҕа диэн эрэнэбин«, — диэн киин дириэктэрэ санаатын үллэстэр. Кини манна даҕатан, коворкинг-хосторго аҕам саастаах дьон сылдьалларыгар усулуобуйа анаан тэриллиэҕин бэлиэтээн эттэ.
+1
+1
+1
+1
+1
+1
+1