Уус Алдан улууһун Чараҥар — “Быйаҥ”, Бороҕонугар “Универмаг” маҕаһыыннарыгар “Үтүө санаа долбуура” акцияны саҕалаатылар. Ити акция маҥнай Дьокуускайга саҕаламмыта, кэлин улуустарга тарҕаммыта хайҕаллаах. Хамсааһын нэһилиэнньэ аҕа саастаах, элбэх оҕолоох араҥатыгар көмөлөһөр сыаллаах тэрилиннэ. Манна ким баҕалаах маҕаһыынтан ас атыылаһан долбуурга ууруон сөп. Кыаммаппын дии сананар киһи, сөбүн көрөн, мантан босхо ылар…
Чэлгийээнэ БАХСЫРОВА, «Саха сирэ» хаһыат, https://edersaas.ru/
Акция ый ахсын биирдии нэдиэлэ ыытыллар. Онуоха тэрилтэлэртэн баҕа өттүлэринэн көмөлөһөр санаалаах кыттыспыт ыччаттар күн ахсын, үлэ чааһын кэннэ, долбуурга ууруллубут аһы-үөлү ыалларынан түҥэтэллэр.
Акцияны ыччаты, дьиэ кэргэни өйүүр социальнай-психологическай киин Уус Алданнааҕы филиала, Мүрү алаас иһинэн “Эдэр ийэлэр”, М.Костромина салайар Чараҥ орто оскуолатын эдэр учууталларын түмсүүлэрэ көҕүлээтилэр.
Чэлгийээнэ БАХСЫРОВА, «Саха сирэ» хаһыат, https://edersaas.ru/