Мүрү 1 №-дээх орто оскуолатыгар Бартыһаан Дьөгүөрэпкэ аналлаах тэрээһин буолла

Гражданскай сэрии Дьоруойа, Бойобуой Кыһыл Знамя уордьан кавалера, саха норуотун номоххо киирбит хорсун-хоодуот киһитэ Гаврил Васильевич Егоров – Бартыһаан Дьөгүөрэп төрөөбүтэ 138 сыла. Ону сэргэ, Уус Алдан улууһун Мүрү 1 №-дээх орто оскуолатыгар кини аата иҥэриллибитэ 70 сыла.

Бэйэбит корр., «Саха сирэ» хаһыат, edersaas.ru

Бэлиэ дааталарга анаммыт тэрээһин туһунан оскуола мусуойун үлэһитэ Елена Сыроватская билиһиннэрдэ:

—1936 с. Мүрү сэттэ кылаастаах оскуолатын икки мэндиэмэннээх мас дьиэтэ (Мүрү 1 №-дээх оскуолата) тутуллан үлэҕэ киириитин, тутууну туруорсубут, салайсыбыт киһинэн Бартыһаан Дьөгүөрэп буолар. САССР Үрдүкү Сэбиэтин Президиумун 1947 с. бэс ыйын 26 күнүнээҕи Ыйааҕынан, оскуолаҕа ытык киһибит  Г.В.Егоров-Бартыһаан Дьөгүөрэп үтүө аата иҥэриллибитэ. Киниэхэ аналлаах өйдөбүнньүк оскуолабыт таһыгар 1965 сыллаахха туруоруллубута. Манна даҕатан эттэххэ, бюст ааптарынан саха дьахталларыттан бастакы скульптор, СӨ искусствотын үтүөлээх диэйэтэлэ, СӨ үөрэҕириитин туйгуна,“Учууталлар учууталлара” Евгения Николаевна Винокурова буолар.  

Бу кэрэ-бэлиэ күннэри, бэлиэ дааталары көрсө уонна үөрэх кэмин тутуһан, бэрт сэргэх тэрээһин буолла. Долгутуулаах күн Байаҕантай нэһилиэгин дьаһалтатыттан, Танда орто оскуолатыттан, Танда мусуойуттан кэлэн кыттаннар, холбоһуктаах тэрээһиммит ураты истиҥник-иһирэхтик ыытылынна. Маныаха дьон-сэргэ күүтүүлээх түһүлгэҕэ Бартыһаан Дьөгүөрэп хос сиэнэ Григорий Васильев Тулагыттан кэлэн кыттыыны ылбытыттан улаханнык астынна. Лоп-бааччы саҥарар эдэр киһи оскуоланы көрдө-иһиттэ, үөрэнээччилэргэ, кэлэктиипкэ, ыалдьыттарга махтанна. Григорий Егорович хос эһэтин дойдутуттан тэйбэт, сибээһи ыкса тутар баҕалааҕын биллэрдэ.

Танда мусуойун үлэһитэ Ефросинья Колодезникова, улуустааҕы оҕо бибилэтиэкэтин сэбиэдиссэйэ Вера Портнягина Г.В.Егоров-Бартыһаан Дьөгүөрэпкэ аналлаах быыстапкаларын билиһиннэрдилэр. Ол кэннэ, оскуола таһыгар турар Бартыһаан Дьөгүөрэп өйдөбүнньүгэр тыыннаах сибэкки дьөрбөтүн ууруу ураты долгутуулаахтык ааста. Сибэкки дьөрбөтүн ытык киһибит хос сиэнэ Григорий Васильев уурда.

Сүгүрүйэр, киэн туттар киһибитигэр анаммыт ааҕыыларга үөрэнээччилэр ох курдук оҥостон, үчүгэйдик бэлэмнэнэн болҕомтону тартылар. Манна ХИФУ историяҕа бакылтыатын эдэр аспираннара: К.Макарова, И.Собакина уонна история бакылтыатын төрдүс кууруһун устудьуона Айсен Попов экспердээтилэр. Түмүккэ оҕолору хайҕаан туран, дохсун ытыс тыаһынан доҕуһуоллатан наҕараадалары, бириистэри туттардылар. Онтон оскуолаҕа омук тылын үөрэтэр эдэр учуутал Варвара Бурцева тэрийбит Т.О.К. оонньуута улахан сэргэхсийиини таһаарда, — диэн кэпсээтэ.

Тэрээһиҥҥэ сылдьыбыт дьон норуот тапталлаах дьоруойугар анаммыт тэрээһинтэн улаханнык үөрэн, дуоһуйан тарҕаспыттар.

Бэйэбит корр., «Саха сирэ» хаһыат, edersaas.ru