М.К. Аммосов аатынан Саха судаарыстыбаннай университет төрүттэммитэ 65 сылын бэлиэтээтилэр

Бэҕэһээ, ахсынньы 22 күнүгэр, Дьокуускайга «Сэргэлээх уоттара» култуура киинигэр М.К. Аммосов аатынан Саха судаарыстыбаннай университет төрүттэмитэ 65 сылын үөрүүлээх быһыыга-майгыга бэлиэтээтилэр. Тэрээһиҥҥэ араас сылга үлэлээбит ректордар, преподавателлэр, выпускниктар, устудьуоннар кыттыыны ыллылар.

Үбүлүөйдээх үтүө киэһэ былааннаммыта ыраатта, ол эрээри дьаҥ мэһэйдээн тэрээһин бэҕэһээ, ахсынньы 22 күнүгэр, Максим Кирович Аммосов төрөөбүт күнүгэр ыытылынна. Манна университет устуоруйатын, билиҥҥи олоҕун-дьаһаҕын, сайдар саҕахтарын туһунан сиһилии кэпсээтилэр, билиһиннэрдилэр.

Ректор Анатолий Николаев бэлиэтээн этэринэн, университет 2030 сылга диэри стратегическай сыалынан Уһук Илиҥҥэ уонна Арктика зуонатыгар научнай-үөрэтэр, эспиэртиир-анаалыстыыр уонна култуурунай сайдыыны түстээһин буолар. Маныаха киһи-аймах сүрүн кыһалҕаларын быһаарарга үөрэх, чинчийии уонна оҥорон таһаарыы үрдүк таһымнаах буолуохтаах.

«Билигин ХИФУ көннөрү университет эрэ буолбатах. Үөрэҕи ылыы уонна наука тэрилтэтэ эрэ буолбакка, кыһабыт өрөспүүбүлүкэ инникитин түстүүр сайдыылаах тэрилтэ быһыытынан үлэлии турар. Аан дойдуга бастыҥ университет аатын ылаары сүҥкэн үлэни ыытабыт. Маныаха аныгы наука уонна макро-эрэгийиэн, дойду ирдэбиллэрин учуоттаан саҥа бырагырааманы толкуйдаабыппыт, «Приоритет 2030″ федеральнай бырайыакка киирдибит уонна байыаннай киини арыйаары сылдьабыт. Бу сотору кэминэн олоххо киириэхтээх былааммыт аҥаара эрэ буолар», — диэн ректор Анатолий Николаев кэпсээтэ.

Үбүлүөйдээх тэрээһининэн Ил Дархан Айсен Николаев эҕэрдэлээтэ. Кини: «Билигин ХИФУ-га 18 тыһыынчаттан тахса устудьуон үөрэнэр. Оттон 1907 сыллаахха хаһыакка суруйбуттарынан, биир эрэ саха үрдүк үөрэхтээҕэ биллэр. Онон биһиги университеппыт төһөлөөх элбэх киһиэхэ үөрэх, билии киэҥ эйгэтин бэлэхтээбитин өйдүөх тустаахпыт. Бу бэлиэ сылга Саха сирэ аан дойду таһымнаах «Хоту» научнай-үөрэтэр киини тэрийэргэ куонкуруһу кыайбыта. Манна ХИФУ бырайыагы үлэлэтэр операторынан буолар», —диэн бэлиэтээн эттэ.

Күүтүүлээх күҥҥэ ректор судаарыстыбаннай наҕараадалары туттарда, ыалдьыттар эҕэрдэлээтилэр, быыстапка тэрилиннэ, итиэннэ үөрэх кыһатын инникитин дьүүллэһэр кэскиллээх кэпсэтиилэри ыыттылар.

Хаартыскалар — ХИФУ пресс-сулууспатыттан.