Саха сирин норуоттарын VIII спортивнай оонньууларын аһыллыытын үөрүүлээх тэрээһинигэр 2,5 тыһыынча кэриҥэ киһи кыттыыны ылан, олус элбэх киһилээх театрализованнай көрдөрүү буолла. Уопсайынан, Спортивнай оонньуулар бары тэрээһиннэригэр улуус олохтоохторо күргүөмүнэн кыттыбыттара хайҕаллаах.
Аҥаардас субуотунньуктарга 5,5 тыһыынча кэриҥэ киһи сылдьыбыт. Бу туһунан улуус баһылыга Алексей Федотов суруналыыстары кытары көрсүһүүгэ иһитиннэрбитэ. Маны таһынан 2 тыһыынча 250 олохтоох дьон стадиоҥҥа оонньуулар аһыллыыларын тэрээһинигэр кыттыбыттар.
Тулуна сэлиэнньэтин олохтоохторо Оонньуулар аһыллыыларыгар көхтөөхтүк кытыннылар. Бу туһунан Тулуна оскуолатын учуутала Людмила Жиркова:
— «Сайа» ансаамбыл хорга кыттаҕыт диэн, биһиги улуус киинигэр күн ахсын киирэн бэлэмнэммиппит. Бэлэмнэнии кэмигэр стадиону тутуу, силигин ситэрии үлэлэрэ ыытыллыбыта. Кыратык долгуйуу да баара. Оонньуулары баттаһа барыта бүтүө дуо диэн. Тутааччылар кэмигэр бүтэрэн, сүрдээх кыраһыабай улахан стадион оҥорбуттарыгар махтанабыт. Биһиги бары төрөөбүт дойдубут патриоттара буолан, кыыспынаан Тулуна оскуолатын 11 кылааһын үөрэнээччитэ Айыына Троевалыын көхтөөхтүк кытынныбыт. Кыыһым бэйэтин баҕатынан 7 көрдөрүүгэ (үҥкүүгэ) кыттыыны ылла. Сайыҥҥы өҥүрүк куйааһы аахсыбакка, күн ахсын сырыттыбыт. Оонньуулар аһыллыылара үрдүк таһымнаахтык ыытылынна. Уус алданнар биир санаанан салайтаран, бары биир киһи курдук үлэлээбиппит көһүннэ. Ураты көстүүлээх бэртээхэй театрализованнай көрдөрүү буолла, — диэн санаатын үллэһиннэ.
edersaas.ru