Бүгүн, сэтинньи 22 күнүгэр, общестенность, бииргэ үлэлээбит, алтыспыт дьоно-сэргэтэ, Суорун Омоллоон аатынан Опера уонна балет судаарыстыбаннай тыйаатырыгар филологическай наука хандьыдаата, СӨ Духуобунаһын академиятын бочуоттаах чилиэнэ, СӨ култууратын үтүөлээх үлэһитэ, Таатта, Өймөкөөн улуустарын уонна Амма нэһилиэгин Ытык киһитэ, ХИФУ дассыана, Алексей Кулаковскай научнай-чинчийэр институтун дириэктиэрэ, Өскөкүлээх Өлөксөй сиэнэ Людмила Реасовна Кулаковскаялыын бырастыыласта.
Ытык киһилиин бырастыылаһыыга өрөспүүбүлүкэ интеллигенцията, суруйааччылар, учуонайдар, култуура үлэһиттэрэ, куорат олохтоохторо, устудьуоннар муһуннулар. Людмила Кулаковская киэҥ өрүттээх научнай, айар үлэтин, олоҕун туһунан ХИФУ профессора, литературовед Прасковья Сивцева билиһиннэрдэ. Бырабыыталыстыбаннай хамыыһыйаттан СӨ култууратын уонна духуобунай сайдыытын миниистирэ Владимир Тихонов, биир дойдулаахтарын ааттарыттан, хамыыһыйа чилиэнэ Иван Андросов, Таатта улууһун баһылыга Михаил Соров, Үөһээ Бүлүү улууһун баһылыга Владимир Поскачин, СӨ судаарыстыбаннай сүбэһитэ Андрей Борисов, саха норуодунай бэйиэтэ Наталья Харлампьева, ХИФУ проректора Надежда Зайкова, «Саха сирэ» хаһыат кылаабынай эрэдээктэрэ Прокопий Бубякин, бииргэ төрөөбүттэрин ааттарыттан Раиса Кулаковская уо.д.а. бырастыылаһар тылы эттилэр.
Нациябыт духуобунай сирдьитэ Өксөкүлээх Өлөксөй нэһилиэстибэтэ норуокка киэҥник тарҕаныытыгар сүҥкэн кылааттаах талааннаах учуонай, кэрэ киһи Людмила Кулаковская аата норуотугар хаһан да умнуллуо суоҕа.
Людмила Реасовна Кулаковскаяны тиһэх суолугар атаарыы сэтинньи 23 күнүгэр Таатта улууһун Дьохсоҕон нэһилиэгин сиригэр Амыдай алааһыгар ыытыллыаҕа.
Татьяна Маркова, https://edersaas.ru