Сэтинньи 15 күнүгэр Санкт Петербурга Норуоттар икки ардыларынааҕы култуура VIII форумун кэмигэр Арассыыйа Федерациятын Култуураҕа министиэристибэтэ олохтообут сыллата ананар “Сыл мецената” бүттүүн национальнай бириэмийэ лауреаттарын наҕараадалаатылар. Быйыл алтыс төгүлүн наҕараадалааһын сиэрэ-туома Фаберже мусуойугар ыытылынна. Үрдүк наҕараадаҕа меценаттар өйөбүллэрин ылбыт култуура тэрилтэлэрэ түһэрэллэр.
edersaas.ru
Култуура миниистирэ Владимир Мединскэй киирии тылыгар эттэ: “Лауреаттарга махтанабын. Кинилэр дойдубут, дьоммут-сэргэбит уонна нуучча култууратын туһугар улахан, улуу дьыаланы оҥороллор”.
“Сыл мецената” номинацияҕа кыайыылааҕынан Патох Шодиев таҕыста. Кини пуондата Арассыыйаҕа Кабуки тыйаатырын труппатын гастролларын генеральнай спонсора этэ. “Арассыыйа култууратын сайдыытыгар уһулуччу кылаатын иһин” наҕарааданы Василий Великэй храмын чөлүгэр түһэрбитин уонна Владимир уобалаһыгар Кистыш сэлиэнньэҕэ Александр Суворов мусуой комплексын төрүттээбитин иһин ылар чиэскэ тигистэ. “Сыл арыйыытынан” меценат Михаил Карисалов ааттанна. Кини Пушкин аатынан Ойуулуур искусство мусуойугар XVIII үйэ хартыыналарын уонна сонун экспонаттары бэлэхтээбитэ.
“Сыл мецената” дипломунан “Алмаасэргиэнбаан” АКБ Бырабылыанньатын Бэрэссэдээтэлэ Людмила Николаева “Таатта улууһун Чөркөөх сэлиэнньэтигэр баар мусуой комплексыгар “XIX үйэ үктүүр миэлиҥсэтэ” (“Мельница топчанка XIX века) мас архитектура пааматынньыктарын чөлүгэр түһэриини тэрийбитин иһин наҕараадаланна.
“Сыл мецената” аахсыйа быйыл алтыс төгүлүн ыытыллар. Арассыыйа 27 эрэгийиэниттэн 47 бигэргэммит сайаапка киирбитэ. Итинтэн көстөрүнэн, меценаттар 2019 сыл устата 944 мөлүйүөн солкуобайы көмөлөспүттэр.
Людмила Валерьевнаны уонна Айсен Сергеевиһы кинилэр эрэгийэн суолталаах култуура нэһилиэстибэтин эбийиэгин чөлүгэр түһэриигэ киллэрбит өҥөлөрө улахан билиниини ылбытынан эҕэрдэлиибит!
Бэлэмнээтэ Женни Стрюкова,
edersaas.ru