Людмила Никитина: «Аадырыстаах социальнай өйөбүл оҥоһулларын биһирээтим»
Үгүс дьон дойду Төрүт Сокуонугар көннөрүү киириитигэр, социальнай өйөбүл ханнык да кириисистэн тутулуга суох, мэһэйэ суох оҥоһуллуохтаах диэн 65-c ыстатыйаҕа болҕомтотун хатаата.
edersaas.ru
Ол курдук, Орто Халыма улууһун Эбээх нэһилиэгин олохтооҕо Людмила Никитина санаатын бу курдук үллэстэр:
— 5 оҕолоох улахан дьиэ кэргэн ийэтэ буоларым быһыытынан, Төрүт Сокуоҥҥа хайдахтаах да экэнэмиичэскэй кириисискэ «аадырыстаах социальнай өйөбүл оҥоһуллара мэктиэлэнэр» диэн дьиэ кэргэҥҥэ туһуламмыт этиини сэҥээрдим. Кырдьык, саҥа ыал буолбут дьоҥҥо (сааһыттан тутулуга суох), бастакы оҕолорун оҕоломмут уонна элбэх оҕолоох ыалларга анал аадырыстаах көмө, өйөбүл наада этэ.
Холобур, урукку Төрүт Сокуонунан биһиги, 1990-2010 сылга диэри оҕоломмут 5 оҕолоох ийэлэр, туох да статуска тиксибэтэхпит хомолтолоох. Мэтээллээҕэр, бэлиэтээҕэр буолуох, судаарыстыбаттан туох да өйөбүлэ суох оҕолорбутун улаатыннардыбыт. Онон урукку Төрүт Сокуоҥҥа көннөрүү киирэрэ хайаан да наада. Ол туһугар, тугу да хаалларан туран, хайаан да куоластыы барыам.
Елена ПОТОЦКАЯ, «Саха сирэ» хаһыат, edersaas.ru