Дьокуускайдааҕы 25-с №-дээх оскуола СӨ салалтата уонна «ВИС» хампаанньа сөбүлэһиилэрин чэрчитинэн тутуллубута.
Сөбүлэһиини Ил Дархаммыт Айсен Николаев Дьокуускай баһылыга эрдэҕинэ Москва куоракка түһэрсибиттэрэ. Былаан быһыытынан, Дьокуускай куоракка былырыын-быйыл икки ардыгар 12 култуура, үөрэх тэрилтэлэрэ дьиэнэн хааччылыннылар.
Людмила Викторовна Данилова, Дьокуускай куорат 25-с №-дээх оскуолатын дириэктэри иитии үлэтигэр солбуйааччы, устуоруйа учуутала:
— Бу оскуола турар сиригэр эргэ мас оскуолабыт турар этэ, онно мин элбэх сыл үлэлээбитим. Саҥа оскуолаҕа былырыын киирбиппит. Биллэн турар, саҥа дьиэҕэ буоларын курдук, быстах-остох кыһалҕалар бааллар этэ. Ол эрээри, олус түргэнник оннун булбута, билигин барыта этэҥҥэ үлэлии турар.
Урукку оскуолабытыгар тэҥнэспэт үчүгэй буоллаҕа дии — киэҥэ-куоҥа, сылааһа, кылаастар сырдыктара! Бу үөрэх дьылын балаҕан ыйын 1 күнүттэн саҕалаабыппыт. Билигин кыра кылаастар манна кэлэн үөрэнэллэр, 17-лии оҕолоох бөлөхтөргө араарбыппыт. Атыттар онлайн үөрэнэ олорорллор. Билигин устуоруйа уруогун онлайн ыыттым, сотору кылааска үөрэтэ барыам. Дьаҥ ааһа охсон, оскуолабытыгар оҕолорбут кэлэллэрин күүтэбит!