Любовь Клюкина «Харысхал» пуонда дириэктэринэн ананна

Бөлөххө киир:

“Харысхал” аһымал пуонда дириэктэринэн Любовь Клюкина ананна. Кини бу иннинэ үлэлээбит дириэктэр Ольга Захарованы солбуйда.

Любовь Николаевна Ленскэйтэн төрүттээх, онно үлэлиир кэмигэр көхтөөх уопсастыбанньык этэ. «Лучи Ленска» диэн волонтерскай хамсааһыны тэрийбитэ уонна салайбыта. 2017 сыллаахха ыараханнык ыалдьар оҕолорго көмөлөһөр Р.Прокопьев аатынан аһымал пуонданы тэрийбитэ. Бу пуонданы арыйыыга “Харысхал” урукку дириэктэрэ Вера Душкевич тиийэ сылдьыбыта. Любовь Клюкина этэринэн, Вера Петровна доруобуйаларыгар хааччахтаах оҕолору кытары үлэлииргэ элбэх сүбэни-аманы биэрбитэ.

Вера Петровна уонна Ольга Иннокентьевна хамаандаларын кытары саҕалаабыт бырайыактарын салгыахтаахпыт уонна саҥаны киллэриэхтээхпит дии саныыбын. Ол курдук, филиаллары кэҥэтии, саҥа бырайыактарга үбүлээһини булуу, пуонда үлэтин дойду таһымыгар тиийэ сырдатыы, о.д.а. үлэ күүтэр. Төрөппүттэр, уопсастыба көмөтүнэн барыта сатаныа диэн эрэллээхпин, — диэн Любовь Николаевна этэр.

Любовь Клюкина 1987 сыллаахха Ленскэйгэ төрөөбүтэ. Кэргэннээх, икки уол оҕолоох. 2010 сыллаахха Красноярскайдааҕы аграрнай университеты, 2018 сыллаахха Арассыыйатааҕы норуот хаһаайыстыбатын уонна судаарыстыбаннай сулууспа академиятын бүтэрбитэ. Бу иннинэ Ленскэйгэ ыччат, дьиэ кэргэн бэлиитикэтин кэмитиэтин бэрэссэдээтэлинэн уонна СӨ ыччат дьыалаларыгар, социальнай коммуникациялар миниистирин солбуйааччынан үлэлээбитэ. Онон тэрийэр, салайар үлэҕэ уопуттаах.

Ангелина Васильева, “Саха сирэ” хаһыат, edersaas.ru

Хаартыска: dobrosakha.ru

+1
0
+1
0
+1
0
+1
0
+1
0
+1
0
+1
0