Аллараа Бэстээх ыстаансыйатыгар тимир суолунан бастакы пуойаһы көрсөн баран, тэрээһин түмүктэниитэ дьон үксэ төттөрү куораттаары, уу суолун көлөтүн — катеры күүтэн, уочараттаан турбуппут.
edersaas.ru
Интэриэһинэйэ баар, айаннааччы үксэ сааһырбыт дьон уонна ыччат этэ. Кэлин санаатахха, оҕолор эбээлэрин уонна эһээлэрин арыаллыы сылдьаллар эбит. Аттыбар турар биир кыыс эбээтэ хамсаатаҕын аайы: «Ыксаама, холкутук тур. Сотору биһиги уочараппыт кэлиэҕэ…», — диирэ. Аҕам саастаах дьон ортотугар «Бочуоттаах пассажир» диэн түөскэ кэтэр бэлиэ суругу иилинэ сылдьар биир сырдык сэбэрэлээх дьахтарга хараҕым хатаммыта. Катербыт кэлэн, иккиэн ыаллыы миэстэҕэ түбэспиппит. Мин кини кимин туоһуласпытым. Онуоха кини: «Любовь Иннокентьевна Федуловабын. БАМ-ҥа уонна АЯМ-ҥа киирсэр бэтэрээммин. Тимир суолу тутааччылар ыстаансыйаларыгар кылаабынай бырааһынан үлэлээбитим», — диэн бэйэтин билиһиннэрдэ.
Любовь Федулова Аллараа Бэстээххэ бастакы пуойас кэлиитигэр бочуоттаах бэтэрээн быһыытынан анаан ыҥырыллан сылдьыбыт. Кинини Алдан оройуонугар Томмот куоракка «Юбилейнай» ГОК ”Алданслюда” санаторий-профилакторийыгар кылаабынай бырааһынан үлэлии сырыттаҕына БАМ тимир суолун тутуу Томмоттооҕу линейнэй врачебнай-санитарнай сулууспатын салалтата Синегорье бөһүөлэгэр кылаабынай бырааһынан анаабыт.
— 1976 сыллаахха саҥа университеты бүтэрээт, Золотинкатааҕы балыыһаҕа кылаабынай бырааһынан анаммытым. Онно бамовецтар хас да тутар этэрээттэрэ баара. Онтон 1988 сыллаахха 50 куойка-миэстэлээх Синегорьетааҕы балыыһаҕа үлэлии кэлбитим. Балыыһаны 11 ый устата тутан бүтэрбиттэр этэ. Оччолорго үлэни кыайар-хотор эдэр дьон тыаны солооһуҥҥа, эбийиэктэри тутууга, тимир суолу тэлэр, таҥар үлэлэргэ сылдьаллара. Эттэринэн-хааннарынан чэгиэн буолан, улаханнык ыалдьар киһи суоҕа. Биирдэ эмэ эчэйдэхтэринэ, иҥиир хоҥуннаҕына эрэ кэлэллэрэ. Ол ыалдьыбыт дьоннорун КРАЗ, МАЗ, Урал массыыналарынан аҕалаллара. Киһилэрин көрдөрөөт, сонно тута илдьэ бараллара. Олорор усулуобуйалара бары ирдэбилгэ эппиэттиирэ. Синегорьеҕа линейнэй санэпидыстаансыйа үлэлиирэ. Эпидемиологы тэҥэ араас идэлээх медицинскэй исписэлиис барыта баара, — диэн ахтар медицинскэй үлэ бэтэрээнэ Любовь Федулова.
Тимир суолу тутааччылар бэтэрээннэригэр тутууну ыйбыт-кэрдибит салайааччылары, хара үлэни үлэлээччилэри тэҥэ эмчиттэр, пуобардар, саҥа арыллыбыт оскуолаларга учууталлар, иитээччилэр эмиэ киирсэллэрэ чахчы. Онон Любовь Иннокентьевна кинини ытыктаан ыҥырбыттарыгар суолталаах бырааһынньыгы тэрийбит дьоҥҥо барҕа махталын тиэрдэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.