Күндү биир дойдулаахтарым, Саха сирин олохтоохторо!
Биһиги, теннисчиттэр, Ил Дархан ыытар политикатын өйүүрбүтүн биллэрэбит!
Хас биирдии киһи бу орто дойдуга кэлэн баран уһуйаантан саҕалаан оскуолаҕа үөрэнэр, билиини-көрүүнү ылар, кинини кыра эрдэҕиттэн үчүгэйи куһаҕантан араарарга үөрэтэллэр, уһуйаллар, сокуону билиһиннэрэллэр. Хас биирдии киһи сокуон кэһиллиэ суохтааҕын, сокуону тутуһуллуохтааҕын билэбит.
Хас биирдиибит олоххо эппиэтинэстээх сыһыаммыт, үлэбит, бэйэ-бэйэҕэ харыстабыллаах сыһыаммыт тус бэйэбититтэн эрэ тутулуктааҕын өйдүөх, билиэх тустаахпыт.
Билигин биһиги өрөспүүбүлүкэбитигэр буола турар айдааны таһаарыыттан, бэйэ-бэйэни холуннарыыттан, дьону күөттээһинтэн, пикеттээһинтэн, дьон өйүн-санаатын бутуйартан туттунуоххайыҥ.
Биһиги, саха норуота, төрүттэрбит саҕаттан, былыр-былыргыттан сэмэй быһыыбытынан, аламаҕай ыраас санаабытынан, киэҥ-холку майгыбытынан, түмсүүлээхпитинэн, хорсун үлэһит, кус быһый дьонноохпутунан биллэн, сайдам саха норуотун аатын баччааҥҥа диэри үрдүктүк тутан кэллибит.
Сокуон хараҕа этэринэн, тойонуттан-хотунуттан, үөрэхтээҕиттэн-үөрэҕэ суоҕуттан тутулуга суох, хас биирдии киһи эппиэтинэһи сүгүөхтээх уонна бэйэтин дьайыыларыгар эппиэттиэхтээх.
Билигин дойдуга экономическэй кириисис хам ылан турар кэмигэр, араас дойдулар бэйэ-бэйэлэрин күөттэһэр кэмнэригэр, биһиги аҕыйах ахсааннаах омук буоларбыт быһыытынан, маннык балысхан долгуҥҥа оҕустарбат курдук бэйэ-бэйэбитигэр үтүө суобастаахтык сыһыаннаһарбыт, өйдөһөрбүт, өйөнсөрбүт хайаан да наада буолуохтаах, оччоҕо эрэ тирээн турар ыарахаттары, харгыстары туоруохпут.
Биһиги хас биирдиибит норуот талбыт Ил Дарханын Е.А.Борисовы, нэһилиэктэрбит баһылыктарын тула түмсэн биир сүбэнэн бэйэбит олохпутун сатабыллаахтык дьаһанан, түөлбэлэрбит, нэһилиэктэрбит, оройуоннарбыт сайдан, өрөспүүбүлүкэбит Россияҕа сайдыытынан инники кирбиигэ тахсарын ситиһиэхтээхпит.
Олох диэн остуол тенниһин курдук ээ! Шаригы төһө күүскэ охсоҕун да, утарылаһааччыҥ ракеткатыттан тэйэн бэйэҕэр соннук күүстээхтик эргиллэр. Олоххо барыта бэйэҕэ эргийэн кэлэр. Хас биирдии тылга болҕомтолоох буолуохха, саха саханы харыстаһыахха!
Любомир Михайлов, СӨ Остуол тенниһигэр федерациятын салайааччы.
