Саха Өрөспүүбүлүкэтигэр Госалкогольконтроль управлениетын уонна эппиэтинэстээх биэдэмэстибэлэр ыйыыларынан, 2016 с. Саха сиригэр арыгылаах бородууксуйаны биирдиилээн атыылыырга алта лицензия тохтотуллубута.
Надежда ЕГОРОВА, «Саха сирэ» хаһыат, edersaas.ru
Көҥүллэрэ быһыллыбыт хааччахтаммыт эппиэтинэстээх уопсастыбалар анал федеральнай акциз маарката суох арыгылаах бородууксуйаны атыылыы олорбуттара.
Госалкогольконтроль управлениета чопчулаабытынан, кинилэр үгүстэрэ арыгы атыылыыр сир турар миэстэтин талыыга сокуон ирдэбилин кэспиттэр. Холобур, Дьокуускайга «Биг» ХЭУо эмп тэрилтэтин уонна Ньурбаҕа «Баалыкай» ХЭУо оҕо тэрилтэтин чугастарыгар турбуттар. Кинилэр атыылыыр көҥүллэрин тохтотор туһунан быһаарыы тохсунньу бүтүүтэ күүһүгэр киириэҕэ.
Манна даҕатан эттэххэ, элбэх предприниматель арыгынан эргиниини бэйэтэ көҥүл өттүнэн тохтоппута кэрэхсэбиллээх. Ол курдук, 2016 с. арыгылаах утаҕы атыылыыр көҥүлү болдьоҕун иннинэ тохтотор туһунан 53 сайабылыанньа управлениеҕа киирбитэ. Предпринимателлар этэллэринэн, үгүс төрүөтүнэн үлэлэрин эйгэтин уларытыы, атыылыыр тэрилтэ сирин-уотун талыыга кытаанах ирдэбиллэр (төһө ыраах туруохтааҕа), нэһилиэккэ арыгылаах бородууксуйаны атыылааһыны тохтотуу уо.д.а. буоллулар.
«Өрөспүүбүлүкэ нэһилиэнньэтин доруобуйатын туһугар арыгынан эргиниини тохтоторго санаммыт предпринимателлар бааллара үөрдэр», – диэн управление салайааччыта Матвей Лыткин санаатын үллэһиннэ.
Надежда ЕГОРОВА, «Саха сирэ» хаһыат, edersaas.ru