Өрөспүүбүлүкэтээҕи лиссиэй үөрэнээччилэрэ араас таһымнаах күрэхтэһиилэргэ кыайдылар. Бэҕэһээ лиссиэй аактабай саалатыгар күрэхтэһии кыайыылаахтара уонна салайааччылара кыттыылаах пресс-кэмпириэнсийэ буолла. edersaas.ru
Номнуо үгэскэ кубулуйбут пресс-кэмпириэнсийэҕэ лиссиэй үөрэнээччилэрэ Арассыыйатааҕы «РОБОФЕСТ-2017» бэстибээлгэ (Москва), ШУНТ — оскуолатааҕы үөрэтэр-научнай турнирга (Киров), «Саха ыччатын-промышленноска» экспедицияҕа (Кыһыл Сыыр-Мирнэй-Ленскэй), «Инникигэ хардыы» кэмпириэнсийэҕэ, «JuniorSkills» уонна «БИЛ» («Будущие интеллектуальные лидеры») күрэхтэһиилэргэ ситиһиилээхтик кыттыбыттарын туһунан учууталларыгар уонна бииргэ үөрэнэр оҕолоругар кэпсээтилэр.
«РОБОФЕСТ-2017» бэстибээл кулун тутарга Москва куоракка буолан ааспыта. Быйылгы бэстибээлгэ, уопсайа, 1500 хамаанда 22 көрүҥҥэ илин-кэлин түһүстүлэр. Лиссиэй үөрэнээччилэрин хамаандатыгар Федор Лыткин, Күндүл Никитин, Вячеслав Слепцов, Артур Степанов киирэн күрэхтэстилэр. Кинилэри лиссиэй учуутала Татьяна Протодьяконова уонна ХИФУ компьютернай академиятын (Малая компьютерная академия) үлэһитэ Сергей Лыткин салайан илдьэ сырыттылар. «Робоппыт бүтэһик түһүмэххэ диэри тиийэн, сорудаҕы барытын этэҥҥэ толорбуппут. Бэстибээл түмүгүнэн биһиги хамаандабыт «Автонет 14+» диэн күрэхтэһиигэ икки кубогы уонна кыһыл көмүс мэтээли ыламмыт, муҥутуур кыайыылаахтар ааттарын сүктүбүт», — диэн оҕолор мустубут дьоҥҥо кэпсээтилэр.
Оттон Киров куоракка ыытыллар Бүтүн Арассыыйатааҕы ШУНТ күрэхтэһиигэ лиссиэй үөрэнээччилэрэ төрдүс төгүлүн ситиһиилээхтик кытталлар. «Мустубут 18 хамаандаттан үс лиигэнэн күрэхтэһэн, эспэримиэн сорудахтарын суоттаан, ону көмүскээтибит. Хамаанда сүрүн састаабыгар Коля Ужинский, Стас Новиков, Сандаара Попова, Мария Мегина, Аман Гаврильев уонна Ньурба техническэй лиссиэйин үөрэнээччитэ Артем Иннокентьев бааллар. Оҕолор биирдиилээн олимпиадаҕа ситиһиилэммиттэрин таһынан, өссө хамаанданан иккис миэстэни ыллылар«, — диэн оҕолору дьарыктаабыт лиссиэй физикаҕа учуутала Гаврил Баишев киэн тутта кэпсиир. Оҕолору Киров куоракка Наука аччыгый академиятын (Малая академия наук) үлэһитэ Алексей Григорьев салайан илдьэ сырытта.Маны таһынан, лиссиэй гуманитарнай салаатын үөрэнээччилэрэ Москваҕа уонна Казаньҥа ыытыллыбыт норуоттар икки ардыларынааҕы кэмпириэнсийэлэргэ, политехническэй салаатын үөрэнээччилэрэ Прокопий Федоров, Георгий Адамов «Саха ыччатын — промышленноска» экспедицияҕа, «JuniorSkills», «БИЛ» («Будущие интеллектуальные лидеры») күрэхтэһиигэ ситиһиилээхтик кыттыбыттарын туһунан кэпсээтилэр.
Өрөспүүбүлүкэтээҕи лиссиэй үөрэнээччилэрин, учууталларын ситиһиилэринэн эҕэрдэлиибит.
Биһиги корр., edersaas.ru