Чебоксары куоракка үлэһиттэр Бүтүн Арассыыйатааҕы IV спартакиадалара түмүктэннэ. Үс күннээх спартакиадаҕа Саха сириттэн Степан, Галина, Семен Федоровтар уонна Надежда, Лилияна, Василий Лукиннар дьиэ кэргэттэрэ кытыннылар. Кинилэр өрөспүүбүлүкэ профсоюзтарын федерацията ыыппыт «Аҕам, ийэм, мин – спортивнай дьиэ кэргэн» куонкуруска кыайан, бүтүн Арассыыйатааҕы спартакиадаҕа кыттар путевканы ылбыттара.
edersaas.ru
Спартакиадаҕа Арассыыйа 40 субъегыттан 1000 кэриҥэ спортсмен күөн көрүстэ. Кинилэр армрестлинҥа, баскетболга, волейболга, гиирэ спордугар, харбааһыҥҥа, чэпчэки атлетикаҕа, остуол тенниһигэр, саахымакка, ханааты тардыыга, спортивнай дьиэ кэргэн күрэҕэр күөн көрүстүлэр.
Спортивнай дьиэ кэргэн түһүмэххэ дьиэ кэргэттэр ортолоругар кыайыылааҕынан Саха сириттэн кэлбит Лукиннар тахсан, үөрүү чыпчаалын дабайдылар.
Кинилэр үс түһүмэҕинэн ыытыллыбыт күрэхтэһиигэ остуол тенниһигэр – 3-с, сүүрүүгэ – 2-с, мэһэйдэри туорааһыҥҥа 1 миэстэни ыллылар. Саха сирин ааттаппыт Лукиннар бары көрүҥнэргэ дьаныардаахтык дьарыктаммыттарын, бэлэмнээхтэрин, түмсүүлээхтэрин көрдөрдүлэр. Лукиннар кэннилэриттэн бириистээх миэстэлэргэ Тюмень уобалаһыттан Ахметовтар уонна Удмуртияттан Нургалиевтар дьиэ кэргэттэрэ тигистилэр.
Спартакиадаҕа маннык күрэхтэһиилэргэ аан бастаан кыттааччылар уонна араас күрэхтэһиилэр хас да төгүллээх кыайыылаахтара, призердара бааллара күрэхтэһии тыҥааһыннаахтарын барарын көҕүлээтэ. Тэрийээччилэр үлэ кэлэктииптэригэр спорт эйгэтигэр хамсааһын тахсарын, чөл олоххо тардыһыы ситиһиилээх үлэ биир бигэ тирэҕэ буоларын астына бэлиэтээтилэр.
ЫСПЫРААПКА:
Үлэһиттэр бүтүн Арассыыйатааҕы спартакиадалара – корпоративнай спорка саамай суолталаахтара уонна киэҥ хабааннаахтара.
Бүтүн Арассыыйатааҕы спартакиада аан бастаан 2012 с. Москваҕа Кыһыл болуоссакка тэриллибитэ.
Бастакы спартакиадаҕа баара-суоҕа 28 хамаанда кыттыбыт буоллаҕына, бырайыак географията сылтан сыл аайы кэҥээн, кыттааччыларын ахсаана элбиир.
Надежда ЕГОРОВА, «Саха сирэ» хаһыат, edersaas.ru