Луганскайтан уонна Донецкайтан кэлбит дьону кытары көрсүһүү буолла.
Бу туһунан СӨ Үлэҕэ уонна социальнай сайдыыга министиэристибэтин пресс-сулууспата иһитиннэрдэ. Ол курдук, СӨ Бырабыыталыстыбатын бэрэстэбиитэллэрэ ДНР уонна ЛНР кэлэн Дьокуускайга быстах кэмҥэ олорор пууҥҥа баар дьону көрсөн кэпсэттилэр, ыйытыыларыгар хоруйдаатылар, сүбэ-ама биэрдилэр. Көрсүһүүнү СӨ киһи быраабыгар боломуочунай Сардаана Гурьева салайда.
Билиҥҥи туругунан Дьокуускайга быстах кэмҥэ дьон олорор пууҥҥа 17 киһи баар, итинтэн түөрдэ оҕолор. Бары кэлбит дьоҥҥо социальнай-бытовой боппуруостары быһаарыыга, үлэлээх буолууга, оҕолор үөрэхтэрин боппуруоһугар көмө оҥоһулунна, дьиэ кэргэттэр гуманитарнай көмөнү ылаллар.
СӨ Үлэҕэ уонна социальнай сайдыыга миниистири солбуйааччы Альбина Трубина, нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Елена Калашникова, нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Яна Наумова уонна миграционнай сулууспа управлениетын структурнай подразделениетын начаалынньыга Аида Бурцева гражданство, үлэ-хамнас, социальнай көмө боппуруостарыгар сүбэлэри-амалары биэрдилэр. Көрсүһүү түмүгүнэн гражданнар ыйытыыларыгар хоруйдары, сиһилии быһаарыылары ыллылар, «Биир дойдулаахтар» бырагырааманы билистилэр.